اسلام آباد۔21مئی (اے پی پی):چیئرمین پاکستان پیپلزپارٹی اور عالمی سفارتی مہم کیلئے قائم کی گئی کمیٹی کے سربراہ بلاول بھٹو زرداری نے کہا ہے کہ بھارت پانی کو اسلحے کے طور پر استعمال کر رہا ہے، جوہری ممالک کے درمیان جنگ ہوئی تو نتائج صرف پاکستان تک محدود نہیں رہیں گے،کشمیر سمیت تمام امور پر بات ہونی چاہیے۔بدھ کو میڈیا سے گفتگو کرتے ہوئے بلاول بھٹو زرداری نے کہا کہ بھارت نے دہشتگردی کی آڑ میں جارحیت کی، پاکستان دہشت گردی سے سب سے زیادہ متاثر ہوا، خطے کو دہشتگردی سے پاک کرنے کیلئے کوئی حل نکالنا چاہیے۔
انہوں نے کہا کہ بھارت پانی کو اسلحہ کے طور پر استعمال کر رہا ہے، پانی کے مسئلے پر آنے والی نسلیں جنگ لڑیں گی؟ یہ افسوسناک ہے، جوہری ممالک کے درمیان جنگ ہوئی تو نتائج صرف پاکستان تک محدود نہیں رہیں گے، پاکستان کا پیغام امن کا پیغام ہے اسے دنیا بھر میں پہنچا رہے ہیں، مودی نے بے بنیاد الزامات لگائے، وزیراعظم نے غیر جانبدارانہ تحقیقات کا مطالبہ کیا۔سفارتی کمیٹی کے سربراہ نے کہا کہ بھارت نے سندھ طاس معاہدے کی خلاف ورزی کی، پانی کے مسئلے کا حل نکالنے کی ضرورت ہے، آنے والی نسلوں کی ذمہ داری ہے کہ نئے مستقبل کیلئے جدوجہد کرنی ہے، کشمیر سمیت تمام امور پر بات ہونی چاہیے۔
سفارتی کمیٹی کے رکن مصدق ملک نے کہا ہے بھارت کے جارحانہ اقدام سے نیا تنازع کھڑا ہوا، بغیر شواہد کے الزامات لگانے کا بیانیہ ہم نے دفن کیا ہے، حقائق عالمی برادری کے سامنے رکھیں گے۔انہوں نے کہا کہ اس جنگ میں بھارت نے عام شہریوں کو نشانہ بنایا، بھارت کا جو گھمنڈ تھا وہ ٹوٹ گیا، پچھلی مرتبہ بھارت نے کہا کہ رافیل ہوتا تو ایسا ہوتا ویسا ہوتا، ہم نے ان کے رافیل کو پرندوں کی طرح پھڑپھڑاتے ہوتے نیچے گرتے دیکھا۔
مصدق ملک نے کہا کہ ہم امن پسند لوگ ہے، امن سے رہنا چاہتے ہیں، کسی نے جارحیت کی کوشش کی تو جواب اس سے کہیں زیادہ ہوگا جو حال ہی میں ہوا ہے، کسی کی بالادستی نہیں، بھارت سے برابری کی سطح پر بات ہوگی۔سابق وفاقی وزیر خرم دستگیر نے کہا کہ بھارت آبی جارحیت کر رہا ہے، بھارت کا مسلم مخالف اور پاکستان مخالف بیانیہ اسے جنگ میں جھونک رہا ہے، بھارت غیر ذمے دار ریاست ہے، رویہ جارحانہ ہے۔
انہوں نے کہا کہ مودی سرکار بیلسٹک میزائل کا استعمال کر کے خطے کو جوہری جنگ کے قریب لے آئی ہے۔کمیٹی کے رکن فیصل سبزواری نے کہا کہ بھارت نے پاکستان کا پانی روکنے کی مذموم سازش کی، کشمیر میں انسانی حقوق کی خلاف ورزیاں کر رہا ہے، ہمارا مقصد پاکستان کا مقدمہ سب کے سامنے رکھنا ہے۔
Short Link: https://urdu.app.com.pk/urdu/?p=599580
