جیل انڈسٹری میں کام کرنے والے قیدیوں کو معاوضہ ملنا شروع ہو گیا ہے،ترجمان محکمہ داخلہ پنجاب

لاہور۔22مارچ (اے پی پی):وزیراعلی پنجاب کے جیل ریفارمز ایجنڈا کے تحت محکمہ داخلہ پنجاب کی اہم کامیابیوں کا سلسلہ جاری ہے۔ ترجمان محکمہ داخلہ پنجاب کے مطابق جیل انڈسٹری میں کام کرنے والے قیدیوں کو معاوضہ ملنا شروع ہو گیا ہے اور پنجاب کی مختلف جیلوں میں ہنر مند قیدی اپنے اہل خانہ کی کفالت کے قابل ہو گئے ہیں۔

انہوں نے کہا کہ ڈسٹرکٹ جیل شاہ پور میں قیدیوں کو نوروزی چپل کی تیاری پر عید سے قبل معاوضہ دیا گیا ہے۔ انہوں نے بتایا کہ قیدیوں کے ہاتھوں تیار کردہ نوروزی چپل مارکیٹ میں فروخت ہو رہی ہے جس کی فروخت سے حاصل ہونے والی اجرت براہِ راست قیدیوں کے ذاتی اکاونٹس میں جمع ہوتی ہے۔ سپرنٹنڈنٹ جیل ابوبکر عبداللہ نے بتایا کہ ماہرین کے زیر نگرانی قیدیوں نے اعلی معیار کی نوروزی چپل تیار کرنا سیکھی۔

انہوں نے بتایا کہ قیدیوں کی تیار کردہ نوروزی چپل اپنی خوبصورتی، معیار اور پائیداری میں منفرد ہے۔ ترجمان کے مطابق قیدیوں کو ہنر مند بنا کر انکے روشن مستقبل کی راہیں ہموار کر رہے ہیں اور ہنرمند قیدی رہائی کے بعد بھی معاشرے کا مفید حصہ ہونگے۔ انہوں نے بتایا کہ گوجرانوالہ چیمبر آف کامرس اینڈ انڈسٹری قیدیوں کی تیار کردہ پراڈکٹ کی فروخت، کسٹمر سروس اور ڈیلیوری میں معاون ہے۔

انہوں نے کہا کہ پنجاب بھر کی جیلوں میں قیدی مختلف مصنوعات تیار کر رہے ہیں۔ جیلوں میں اعلی معیار کا فرنیچر، قالین، ہینڈی کرافٹس، برتن، پیپر، ٹائلیں، فینائل، پرفیوم، صابن، ایل ای بلب، ٹشو پیپر، فٹبال وغیرہ تیار ہو رہے ہیں۔

مختلف جیلوں میں قیدیوں کو موٹر مکینک، حجام، خانساماں، بیوٹیشن اور آئی ٹی کے کورسز بھی کروائے جا رہے ہیں۔ انہوں نے بتایا کہ جیل انڈسٹری اور ہنر مند قیدی جیل ریفارمز کی اعلی مثال ہیں۔

Short Link: https://urdu.app.com.pk/urdu/?p=575493