اسلام آباد۔20نومبر (اے پی پی):حسابات جاریہ کے کھاتوں کے خسارے میں جاری مالی سال کے پہلے چار ماہ میں سالانہ بنیادوں پر نمایاں کمی ریکارڈ کی گئی ہے۔ سٹیٹ بینک کی جانب سے جاری کردہ اعدادوشمار کے مطابق جاری مالی سال کے پہلے چار ماہ میں حسابات جاریہ کے کھاتوں کا خسارہ 1.059 ارب ڈالر ریکارڈ کیا گیا۔
گزشتہ مالی سال کی اسی مدت میں حسابات جاریہ کے کھاتوں کا خسارہ 3.107 ارب ڈالر تھا۔ اکتوبر 2023 میں حسابات جاریہ کے کھاتوں کا خسارہ 74 ملین ڈالر ریکارڈ کیا گیا جو ستمبر میں 46 ملین ڈالر اور گزشتہ سال اکتوبر میں 849 ملین ڈالر تھا۔
اعدادوشمار کے مطابق جاری مالی سال کے پہلے چار ماہ میں پرائمری بیلنس 2.451 ارب ڈالر ریکارڈ کیا گیا جو گزشتہ مالی سال کی اسی مدت کے مقابلے میں 62 فیصد زیادہ ہے۔ گزشتہ مالی سال کی اسی مدت میں پرائمری بیلنس 1.514 ارب ڈالر ریکارڈ کیا گیا تھا۔
