اسلام آباد۔9جولائی (اے پی پی):وزیراعظم محمد شہباز شریف نے کہا ہے کہ حکومت معاشی بحالی کے لئے مؤثر اقدامات اٹھا رہی ہے،سرکاری ملکیتی اداروں کی نجکاری کی جا رہی ہے ،حکومتی اخراجات میں کمی کے لئے غیر فعال اداروں کو ختم کیا جا رہا ہے اور ڈاؤن سائزنگ کی پالیسی پر عمل کیا جا رہا ہے،فیڈرل بورڈ آف ریونیو سمیت معیشت کی ڈیجیٹائزیشن کی جائے گی۔
وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے منگل کو برطانوی ایجوکیشنسٹ اور برطانوی وزیراعظم کے ڈیلیوری یونٹ کے سابق سربراہ سر مائیکل باربر کی زیر قیادت وفد سے گفتگو کرتے ہوئے کیا جس نے وزیراعظم سے یہاں ملاقات کی۔وفد میں برطانوی فارن، ڈویلپمنٹ اور کامن ویلتھ آفس کی ڈائریکٹر جو موئیر، اور سینئر گورننس ایڈوائزرز نوید عزیز اور میٹ کلینسی شامل تھے۔
وزیراعظم نے کہا کہ پاکستان اور برطانیہ کے تاریخی دو طرفہ تعلقات ہیں جو کہ دہائیوں پر محیط ہیں اور وقت کے ساتھ مزید مضبوط ہو رہے ہیں، پاکستان برطانیہ کے ساتھ اپنے تعلقات کو قدر کی نگاہ سے دیکھتا ہے۔ انہوں نے کہا کہ برطانیہ پاکستان میں مختلف شعبوں میں معاونت فراہم کر رہا ہے اور پاکستان کا اہم شراکت دار ہے ، ہم برطانوی حکومت کے شکر گزار ہیں ، دونوں ممالک کے عوام کے باہمی روابط کو مزید مضبوط کیا جائے گا۔
وزیراعظم نے کہا کہ حکومت پاکستان ملک کی معاشی بحالی کے لئے مؤثر اقدامات اٹھا رہی ہے، سرکاری ملکیتی اداروں کی نجکاری کی جا رہی ہے ، فیڈرل بورڈ آف ریونیو سمیت معیشت کی ڈیجیٹائزیشن کے لئے اقدامات کئے جا رہے ہیں، حکومتی اخراجات میں کمی کے حوالے سے غیر فعال اداروں کو ختم کیا جا رہا ہے اور ڈاؤن سائزنگ کی پالیسی پر عمل کیا جا رہا ہے۔ انہوں نے کہا کہ برآمدات اور ٹیکس بیس میں اضافہ کے لئے اقدامات اٹھائے جا رہے ہیں۔ پاکستان میں انفارمیشن ٹیکنالوجی اور زراعت سے متعلقہ برآمدات کے حوالے سے بے پناہ استعداد ہے۔ وفد کو بریفنگ میں بتایا گیا کہ وفاقی وزارتوں کی کارکردگی جانچنے کے حوالے سے ٹاسک مینجمنٹ سسٹم کا قیام عمل میں لایا جا چکا ہے ۔
سر مائیکل باربر نے حکومت کے معاشی بحالی کے پلان کی تعریف کی اور کہا کہ حکومت معاشی اصلاحات کے حوالے سے ٹھیک سمت میں جا رہی ہے ۔ انہوں نے امید ظاہر کی کہ وزیراعظم شہباز شریف کی موثر قیادت میں پاکستان جلد ہی معاشی مشکلات قابو پانے میں کامیاب ہو گا ۔ وفد کے ارکان نے کہا کہ برطانیہ پاکستان کو ہر شعبے میں بھرپور مدد اور تعاون فراہم کرے گا ، پاکستان کی ترقی ہماری ترقی ہے ۔
ملاقات میں وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر صنعت و پیداوار رانا تنویر حسین ، وزیر مملکت برائے انفارمیشن ٹیکنالوجی و ٹیلی کام شزہ فاطمہ ، وزیراعظم کے کوآرڈینیٹر رانا احسان افضل ، ڈپٹی چیئرمین پلاننگ کمیشن جہانزیب خان اور متعلقہ اعلیٰ سرکاری افسران موجود تھے
Short Link: https://urdu.app.com.pk/urdu/?p=483176
