کراچی۔ 27 اکتوبر (اے پی پی):متحدہ قومی موومنٹ پاکستان کے چیئرمین ڈاکٹر خالد مقبول صدیقی کا کشمیر میں بھارتی افواج کے قبضے کے ظالمانہ 77 سال مُکمل ہونے پر مذمت اور کشمیری عوام سے یکجہتی کا اظہار کیا ہے۔ اپنے جاری مذمتی بیان میں انہوں نے کہا کہ دورِ جدید میں جب دُنیا کائنات کے رازوں کو افشاء کرنے کی تگ و دو میں مصروف عمل ہے تب لاکھوں شہریوں کو حق خوارادیت سے محروم کیا جانا اور اُن کا معاشی تعلیمی استحصال کرکے اُنہیں گھروں میں قید رکھنا ظالمانہ سوچ کی عکاس ہے ،
اِس ظالمانہ تسلط نے بھارت کے نام نہاد سیکولر ریاست ہونے کے دعوے کی بھرپُور نفی کر دی ہے۔ ڈاکٹر خالد مقبول صدیقی نے مزید کہا کہ بھارت کا اقوامِ متحدہ کی قرادادوں کو نظر انداز کرکے اپنی ہٹ دھرمی پر قائم رہنا عالمی امن کی بات کرنے والوں پر سوالیہ نشان ہے۔ بھارتی افواج نے حُریت پسند رہنماؤں اور کشمیری عوام پر جو ظُلم ڈھا رکھا ہے اُس نے بھارتی سرکار کے ناپاک عزائم کا پردہ چاک کر دیا ہے،
ڈاکٹر خالد مقبول صدیقی نے اقوامِ عالم سے مطالبہ کرتے ہوئے کہا کہ کشمیر اور فلسطین سمیت تمام مقبوضہ علاقوں کے سلب حقوق واپس دلوانے کیلئے اپنا کردار ادا کریں ورنہ تاریخ کے اوراق میں اِس سلوک ناروا پر آپ کی حیثیت بھی مشکوک قرار دی جائے گی۔
Short Link: https://urdu.app.com.pk/urdu/?p=517474
