اسلام آباد۔10فروری (اے پی پی):پاکستان قطر دو طرفہ سیاسی مشاورت کا دوسرا دور پیر کو دوحہ قطر میں ہوا۔ دفتر خارجہ کے مطابق پاکستانی وفد کی قیادت سیکرٹری خارجہ آمنہ بلوچ نے کی جبکہ قطری وفد کی قیادت قطر کے وزیر مملکت برائے خارجہ امور سلطان بن سعد المراخی نے کی۔
دونوں فریقوں نے دوطرفہ تعلقات کے تمام پہلوئوں کا جائزہ لیا جن میں دوطرفہ تعاون کو مزید وسعت دینے کے لیے سیاسی، اقتصادی، قونصلر اور عوام سے عوام کے رابطے شامل ہیں۔ انہوں نے علاقائی اور بین الاقوامی مسائل پر بھی تبادلہ خیال کیا اور تعاون اور مشاورت جاری رکھنے کے عزم کا اعادہ کیا۔
فریقین نے دوطرفہ تعلقات میں اضافے کی رفتار اور اعلیٰ سطح کے دوروں اور تبادلوں کی رفتار کو تسلیم کرتے ہوئے باہمی دلچسپی کے تمام شعبوں میں دوطرفہ تعلقات کو مزید مضبوط بنانے پر اتفاق کیا۔ پاکستان قطر دو طرفہ سیاسی مشاورت کا اگلا دور اسلام آباد میں باہمی طور پر طے شدہ تاریخوں پر ہوگا۔
Short Link: https://urdu.app.com.pk/urdu/?p=558652
