دہشتگردوں کے مذموم عزائم خاک میں ملانے وا لوں کو سلام پیش کرتے ہیں،وفاقی وزیرداخلہ کا بلوچستان میں شہید ہونے والے میجر بابر خان کو خراج عقیدت

Federal Interior Minister Mohsin Naqvi
Interior Minister Mohsin Naqvi

اسلام آباد۔15مئی (اے پی پی):وفاقی وزیرداخلہ محسن نقوی نے بلوچستان کے علاقے میں دہشتگردوں کے خلاف آپریشن میں شہید ہونے والے میجر بابر خان کی بہادری کو زبردست الفاظ میں خراج عقیدت پیش کرتے ہوئے کہا ہے کہ شہدا وطن نے اپنے قیمتی لہو سے امن کی آبیاری کی ہے اورپوری قوم کو شہدا کی عظیم قربانیوں پر ناز ہے۔

بدھ کو اپنے بیان میں وفاقی وزیر داخلہ نے شہید میجر بابر خان کے اہل خانہ سے دلی ہمدردی و تعزیت کا اظہار کیا۔ انہوں نے کہا کہ میجر بابر خان نے دہشتگردوں کے خلاف بہادری سے لڑتے ہوئے اپنی قیمتی جان وطن پر نچھاور کی۔ شہید میجر بابر خان نے جرات کے ساتھ دہشتگردوں کو جہنم واصل کیا۔ دہشتگردوں کے مذموم عزائم خاک میں ملانے والے شہید میجر بابر خان کو سلام پیش کرتے ہیں۔ انہوں نے کہا کہ میجر بابر خان نے شہادت کا بلند ترین رتبہ پایا۔ شہید میجر بابر خان کی قربانی رائیگاں نہیں جانے گی۔