اسلام آباد/ کوئٹہ۔19مارچ (اے پی پی):صدر مملکت آصف علی زرداری نے کہا ہے کہ بلوچستان کے لئے عوامی فلاح و بہبود کے اقدامات کو بارآور بنایا جائے گا، بلوچستان اور عوامی بہبود کیلئے ایسے اقدامات کریں گے جسے بلوچستان کی تاریخ میں سنہرے الفاظ میں یاد رکھا جائے گا، دہشت گرد عناصر کو ہر قیمت پر شکست دیں گے، دہشت گرد قوم کو تقسیم کرنا چاہتے ہیں، صورتحال واضح ہے ریاست نے رہنا ہے اور دہشت گردی کے خلاف جنگ جیتنی ہے، انسداد دہشت گردی ونگ کو جدید اسلحہ فراہم کریں گے۔ ایوان صدر کے پریس ونگ سے جاری بیان کے مطابق صدر مملکت نے ان خیالات کا اظہار بدھ کو کوئٹہ میں بلوچستان کی پارلیمانی پارٹیوں کے اراکین سے ملاقات اور امن و امان کی صورتحال پر اہم اجلاس کی صدارت کرتے ہوئے کیا۔
صدر مملکت کو بلوچستان اسمبلی میں اپوزیشن لیڈر اور سیاسی جماعتوں کے پارلیمانی لیڈرز نے صوبے کو درپیش مسائل اور عوامی بہبود پر مختلف تجاویز پیش کیں۔ ملاقات میں پاکستان پیپلزپارٹی کے چیئرمین بلاول بھٹو زرداری نے بھی خصوصی شرکت کی۔ انہوں نے کہا کہ بلوچستان کے لوگوں سے دلی لگائو اور دیرینہ تعلقات ہیں، بلوچستان کی ترقی اور عوام کی بہبود ہمیشہ اولین ترجیح رہی ہے۔ صدر مملکت نے کہا کہ اٹھارویں آئینی ترمیم کے ذریعے بلوچستان سمیت صوبوں کو خود مختاری دی، بحیثیت پاکستانی ہم نے قومی یکجہتی سے وطن عزیز کو آگے لےکر جانا ہے۔
آصف علی زرداری نے کہا کہ ہم سب کو ان کا حق دینا چاہتے ہیں حقوق چھیننا نہیں چاہتے، حقوق دے کر ہی لوگوں کا دل جیتیں گے، عید کے بعد بلوچستان میں کیمپ لگائوں گا ، تفصیل سے ہر کسی کو سنوں گا۔ بلوچستان اسمبلی میں اپوزیشن لیڈر میر یونس عزیز زہری نے وزیر اعلیٰ بلوچستان میر سرفراز بگٹی کے اقدامات کی تعریف کی اور انہیں مکمل تعاون کی یقین دہانی کرائی۔
ملاقات میں قائم مقام گورنر بلوچستان کیپٹن (ر) عبدالخالق اچکزئی اور وزیر اعلیٰ بلوچستان میر سرفراز بگٹی بھی موجود تھے۔ نیشنل پارٹی کے سربراہ ڈاکٹر عبدالمالک بلوچ، پاکستان مسلم لیگ کے پارلیمانی لیڈر میر سلیم خان کھوسہ، عوامی نیشنل پارٹی کے پارلیمانی لیڈر انجینئر زمرک خان اچکزئی اور جماعت اسلامی کے رکن میر عبدالمجید بادینی ملاقات میں شریک تھے۔ بلوچستان کابینہ کے ارکان، صوبائی وزراء، پارلیمانی سیکرٹریز اور ایم پی ایز بھی ملاقات میں موجود تھے۔ دریں اثناءصدر مملکت آصف علی زرداری کی زیر صدارت امن و امان کی صورتحال پر کوئٹہ میں اہم اجلاس منعقد ہوا۔ اجلاس میں چئیرمین پاکستان پیپلزپارٹی بلاول بھٹو زرداری نے خصوصی شرکت کی۔
وزیر اعلیٰ بلوچستان میر سرفراز بگٹی نے صوبے میں امن و امان کی صورتحال پر بریفنگ دی۔ اس موقع پر صدر مملکت نے کہا کہ دہشت گرد عناصر کو ہر قیمت پر شکست دیں گے، دہشت گرد قوم کو تقسیم کرنا چاہتے ہیں، صورتحال واضح ہے ریاست نے رہنا ہے، دہشت گردی کے خلاف جنگ جیتنی ہے، انسداد دہشت گردی ونگ کو جدید اسلحہ فراہم کریں گے۔صدر نے کہا کہ بلوچستان دل کے قریب ہے، صوبے کی ترقی اور پائیدار امن چاہتے ہیں ، بلوچستان کے ہر بچے کو اسکول میں دیکھنا چاہتے ہیں اور جدید ٹیکنالوجی سے بچوں کو روشناس کرانا وقت کی ضرورت ہے۔ اجلاس میں قائم مقام گورنر بلوچستان کیپٹن (ر) عبدالخالق اچکزئی، چیف سیکرٹری بلوچستان شکیل قادر خان، آئی جی پولیس معظم جاہ انصاری سمیت اعلیٰ حکام نے شرکت کی۔
Short Link: https://urdu.app.com.pk/urdu/?p=574379
