اسلام آباد۔25فروری (اے پی پی):وفاقی وزیر منصوبہ بندی ترقی واصلاحات وخصوصی اقدامات اسد عمر نے کہاہے کہ رنگ روڈ منصوبہ راولپنڈی شہر کے اندر ٹریفک کے نظام کو بہتر بنانے میں بہت معاون ثابت ہوگا ،
شہریوں کے ٹریفک مسائل حل ہوں گے اور علاقے میں معاشی سرگرمیوں میں تیزی آئے گی، منصوبے کے امور کی ٹائم لائن جلد طے کرنے اور تیزی سے معاملات آگے بڑھایا جائے اس منصوبے کی طے کردہ ٹائم لائن میں کوئی تاخیر نہیں ہونی چاہیے۔جمعرات کو کمشنر راولپنڈی محمد محمود نےوفاقی وزیر برائے منصوبہ بندی ترقی اور خصوصی اقدامات اسد عمر کو جڑواں شہروں کے فلیگ شپ منصوبہ رنگ روڈ پر جاری ترقیاتی کاموں کی پیش رفت سے متلعق آگاہ کیا ۔
اجلا س میں وزیر اعظم کے معاون خصوصی برائے سی ڈی اے علی نواز اعوان اور وزارت منصوبہ بندی کے اعلی عہدیداران نے شرکت کی ۔ اسلام آباد میں ہونے والی بریفنگ میں کمشنر راولپنڈی محمد محمود نے وفاقی وزیر کو بتایا کہ رنگ روڈ کی تجویز کردہ لمبائی 64 کلومیٹر ہے جو روات سے شروع ہو گی اور اس کے بعد اسلام آباد سے منسلک ہونے کے لیے ایم-2 اور ایم -1 سے ہوتی ہوئی یہ سڑک این۔5 کو عبور کر کے سنگجانی پر اختتام پزیر ہو گی، اس سڑک پر چھ لین اور آٹھ انٹر چینج ہوں گے۔رنگ روڈ منصوبہ کی موجودہ پیش رفت پر بات کرتے ہوئے کمشنر راولپنڈی کا کہنا تھا کہ رنگ روڈ منصوبہ کی فزیبلٹی سٹڈی مکمل ہوچکی ہے ، الائنمنت کو حتمی شکل دی جا چکی ہے ،
پنجاب پبلک پرائیویٹ اتھارٹی کے ذریعہ پبلک پرائیویٹ اتھارٹی کی تجویز بھی منظور ہو چکی ہے ، 65 کلومیٹر سنگجانی تک حد بندی کی جا چکی ہے ، زمین کے حصول کے لیے معاوضہ کی ادائیگی بھی شروع ہو چکی ہے، سڑک کی تعمیر کے لیے مختلف محکموں سے ضروری اجازت نامے جاری کیے جا چکے ہیں ، انٹرنیشنل ٹینڈر تیار ہے جو اگلے ہفتہ اخبارات میں دے دیا جائےگا ۔ وفاقی وزیر اسد عمر نے پیش رفت کے حوالے سے راولپنڈی کی انتظامیہ کے کام کو سراہا اورکہا ۔\932
