اسلام آباد۔22اپریل (اے پی پی):وزیراعظم محمد شہبازشریف نے روانڈاکے ساتھ تجارت اور سرمایہ کاری سمیت مختلف شعبوں میں تعاون کو مزید فروغ دینے کے عزم کا اعادہ کرتےہوئے کہا کہ کاروباری روابط سے دوطرفہ تجارت بڑھانے میں مدد ملےگی۔ وزیراعظم آفس کے میڈیا ونگ سے جاری بیان کے مطابق ان خیالات کا ا ظہار انہوں نے جمہوریہ روانڈا کے خارجہ امور اور بین الاقوامی تعاون کے وزیراولیویئے جین پیٹرک ڈوہنجیریہے سے گفتگوکرتےہوئے کیا جنہوں نے منگل کو یہاں ان سے ملاقات کی۔
ملاقات میں وزیر اعظم نے روانڈا کے وزیر خارجہ کا خیرمقدم کیا اور صدر پال کاگامے اور وزیر اعظم ایڈورڈ گیرنٹے کے لئے نیک خواہشات کا اظہار کیا۔ انہوں نے صدر پال کاگامے کو پاکستان کا سرکاری دورہ کرنے کی دعوت دی۔ دونوں ممالک کے درمیان دوطرفہ تعلقات کے فروغ پر اطمینان کا اظہار کرتے ہوئے وزیراعظم نے روانڈا کے ساتھ مختلف شعبوں بالخصوص تجارت، سرمایہ کاری اور عوامی تبادلوں میں باہمی طور پر مفید تعاون کو مزید مضبوط بنانے کیلئے پاکستان کی خواہش کا اعادہ کیا۔ وزیراعظم نے روانڈا کو اسلام آباد میں اپنا مشن کھولنے پر مبارکباد دی اور کہا کہ یہ بزنس ٹو بزنس روابط سے دوطرفہ تجارت کو بڑھانے میں معاون ثابت ہو گا۔
روانڈا کے وزیر خارجہ نے وزیر اعظم کی نیک تمناؤں پر شکریہ ادا کیا اور کہا کہ روانڈا پاکستان کے ساتھ تجارتی اور اقتصادی تعلقات کو مضبوط بنانے کا خواہاں ہے۔ انہوں نے مزید بتایا کہ ایک تجارتی وفد ان کے ساتھ پاکستان آیا ہوا تھا اور لاہور میں تجارت کے فروغ کیلئے منعقدہ تقریب میں شریک ہوا۔ملاقات میں دونوں ممالک کے مابین اقوام متحدہ میں کثیرالجہتی تعاون پر بھی گفتگو ہوئی۔ پاکستان اور روانڈا کے درمیان بین الاقوامی فورمز پر مشترکہ اقدار، باہمی اعتماد اور تعاون پر مبنی دوستانہ اور خوشگوار تعلقات ہیں۔
Short Link: https://urdu.app.com.pk/urdu/?p=585737
