روس پاکستان کا اہم شراکت دار ہے، دونوں ممالک کے درمیان روابط اور توانائی تعاون کو فروغ دینے سے ہمارے عوام کے ساتھ ساتھ خطے کو بھی فائدہ ہوگا، نگران وزیراعظم انوار الحق کاکڑسے روسی سفیر کی الوداعی ملاقات

اسلام آباد۔23نومبر (اے پی پی):نگران وزیراعظم انوار الحق کاکڑ نے کہا ہے کہ روس خطے اور بین الاقوامی سطح پر اہم ملک اور پاکستان کا اہم شراکت دار ہے، دونوں ممالک کے درمیان روابط اور توانائی تعاون کو فروغ دینے سے ہمارے عوام کے ساتھ ساتھ خطے کو بھی فائدہ ہوگا۔جمعرات کو وزیراعظم آفس کے میڈیا ونگ سے جاری بیان کے مطابق نگران وزیراعظم انوار الحق کاکڑ سے پاکستان میں روس کے سفیر ڈینیلا گانچ نے الوداعی ملاقات کی۔

وزیراعظم نے دوطرفہ تعلقات کو مزید مضبوط بنانے کے لئے روسی سفیر کے گرانقدر تعاون کو سراہا۔ انہوں نے روسی سفیر کو ان کی آئندہ ذمہ داری کے لئے نیک خواہشات کا اظہار کیا اور امید ظاہر کی کہ وہ ہمیشہ پاکستان کے دوست رہیں گے۔دو طرفہ تعلقات پر تبادلہ خیال کرتے ہوئے وزیراعظم نے اس بات پر زور دیا کہ روس، خطے اور بین الاقوامی سطح پر ایک اہم ملک اور پاکستان کا ایک اہم شراکت دار ہے۔

وزیراعظم نے دوطرفہ تعلقات کے مسلسل فروغ پر اطمینان کا اظہار کیا اور باہمی فائدہ مند تعاون کو مزید فروغ دینے کی ضرورت کا اعادہ کیا۔ وزیراعظم نے کہا کہ دونوں ممالک کے درمیان روابط اور توانائی تعاون کو فروغ دینے کے کلیدی شعبے ہیں جس سے ہمارے لوگوں کے ساتھ ساتھ خطے کو بھی فائدہ ہوگا۔وزیراعظم نے بین الاقوامی فورمز پر دونوں ممالک کے درمیان تعاون کو بھی سراہا۔

Short Link: https://urdu.app.com.pk/urdu/?p=413575