اسلام آباد۔30جولائی (اے پی پی):وفاقی وزیر برائے صنعت و پیداوار و نیشنل فوڈ سکیورٹی رانا تنویر حسین نے کہا ہے کہ زرعی شعبے کو جدید تقاضوں پہ تبدیل کرنے کے لیے پرعزم ہیں،زرعی شعبے نے 6.25 فیصد ترقی کی ہے جس سے مجموعی اقتصادی ترقی کی شرح میں 2.38 فیصد اضافہ ہوا ہے۔ان خیالات کا اظہار انہوں نے منگل کو پاکستان زراعت کی تبدیلی کے عنوان سے سیمینار سے خطاب کرتے ہوئے کیا ۔
انہوں نے کہا کہ زرعی شعبے کو جدید تقاضوں پہ تبدیل کرنے کے لیے پرعزم ہیں، زرعی شعبے میں شراکت داروں کے ساتھ تعاون پہ کام جاری ہے، گذشتہ سال زرعی شعبے نے دوسرے شعبوں کی نثبت شاندار نتائج دیئے ہیں۔ رانا تنویر حسین نے کہا کہ زرعی شعبے نے 6.25 فیصد ترقی کی ہے جس سے مجموعی اقتصادی ترقی کی شرح میں 2.38 فیصد اضافہ ہوا ہے،فصلوں کی بہتر پیداوار نے برآمدات کو فروغ دیا ہے، زرعی شعبے کو درکار ادارہ جاتی مدد فراہم کر رہے ہیں، پاکستان میں رائج کاشتکاری کے روایتی طریقے غیر پائیدار اور ناکارہ ہیں، اس سے اخراجات میں اضافہ اور منافع میں کمی واقع ہوتی ہے۔
انہوں نے کہا کہ زرعی شعبے میں نئی ٹیکنالوجی کا استعمال بہت ضروری ہے، نئی ٹیکنالوجی کے استعمال سے ماحولیاتی اثرات کو کم کیا جا سکتا ہے۔ آئی سی ٹی، آئی او ٹی، موبائل ایپلی کیشنز، جی پی ایس/جی آئی ایس، اور یو اے وی – روایتی کاشتکاری کے طریقوں کو تبدیل کرنے میں اہم کردار ادا کر رہے ہیں۔
Short Link: https://urdu.app.com.pk/urdu/?p=488891
