لاہور۔17اپریل (اے پی پی):پنجاب کے وزیر صنعت و تجارت چوہدری شافع حسین نے کہا ہے کہ پاکستان معدنیات کی دولت سے مالا مال ہے،بلوچستان میں اربوں ڈالر کے کاپر اورپنجاب میں زنک کے ذخائر موجود ہیں،زنک الیکٹرک وہیکلز میں استعمال ہوتا ہے، معدنیات کی ویلیو ایڈیشن کے بعد ایکسپورٹ کر کے قیمتی زرمبادلہ کمایا جاسکتا ہے۔ان خیالات کا اظہار انہوں نے جمعرات کو یہاں ایکسپو سینٹر جوہر ٹائون میں چوتھے ہیلتھ، انجینئرنگ اینڈ منرلز شو 2025کی افتتاحی تقریب سے خطاب کرتے ہوئے کیا۔
چوہدری شافع حسین نے کہا کہ ٹریڈ ڈویلپمنٹ اتھارٹی آف پاکستان(ٹڈاپ) کے زیر اہتمام یہ نمائش 3دن تک جاری رہے گی،نمائش میں 180مقامی اور 160غیر ملکی کمپنیوں کے مندوبین شریک ہیں۔صوبائی وزیرصنعت وتجارت نے نمائش میں لگائے گئے سٹالز کا معائنہ کیا اور یہاں رکھی گئی مصنوعات کا مشاہدہ کیا۔اس موقع پر گفتگوکرتے ہوئے صوبائی وزیر نے کہاکہ زمین میں چھپے خزانوں کو بروئے کار لاکر قومی معیشت کو مضبوط کیا جاسکتا ہے،
وزیر صنعت و تجارت نے کہاکہ وزیر اعلی پنجاب کی ہدایت پر سالٹ رینج میں نئی انڈسٹریل اسٹیٹ بنا رہے ہیں،قائد اعظم بزنس پارک شیخوپورہ میں 130ایکڑ رقبے پر فارما سیوٹیکل ویلی بنائی جائے گی،پنجاب کے سپیشل اکنامک زونز میں سرمایہ کاروں کو خصوصی مراعات دی جارہی ہیں،یہاں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کرنے کی سہولت موجود ہے۔
اس کے علاوہ انڈسٹریل اسٹیٹس میں صنعتی یونٹس لگانے کیلئے لیز پر بھی زمین دی جارہی ہے۔ چوہدری شافع حسین نے کہاکہ ملکی و غیر ملکی سرمایہ کار پنجاب میں سرمایہ کاری کے مواقع سے فائدہ اٹھائیں۔ صوبائی وزیر نے کہا کہ نمائش کا انعقاد ٹڈاپ کی بہترین کاوش ہے،ایسی نمائشیں معاشی سرگرمیوں کے فروغ کا باعث بنتی ہیں۔سیکرٹری( ٹڈاپ) شہریار تاج،سی ای او فیض احمد چدھڑ،ڈی جی رافعہ سید،صدر ایوان صنعت و تجارت ابو ذر شاد اور دیگر بھی موجود تھے۔
Short Link: https://urdu.app.com.pk/urdu/?p=583430
