سحری، افطار اور ہر نماز کے وقت سکیورٹی ہائی الرٹ رکھی گئی ہے، ڈی آئی جی آپریشنز

لاہور۔13مارچ (اے پی پی):ڈی آئی جی آپریشنز کا فجر کے وقت مساجد کا سرپرائز دورہ، سکیورٹی انتظامات کا جائزہ لیا۔ڈی آئی جی آپریشنز فیصل کامران نے اقبال ٹان ڈویژن میں مختلف مساجد کا سرپرائز دورہ کیا اور سکیورٹی انتظامات کا جائزہ لیا۔ انہوں نے مون مارکیٹ اور وحدت کالونی میں مختلف مساجد کی سکیورٹی چیک کی اور ڈیوٹی پر موجود اہلکاروں کی حاضری کو یقینی بنانے کے لیے ان کا معائنہ کیا۔

اس موقع پر ڈی آئی جی آپریشنز نے کہا کہ تمام ایس پیز، ایس ڈی پی اوز اور ایس ایچ اوز فیلڈ میں موجود ہیں اور مساجد کی سیکورٹی کے حوالے سے سرپرائز چیکنگ کا سلسلہ جاری ہے۔ انہوں نے مزید کہا کہ شہر بھر کی تمام مساجد کے لیے ترتیب دیے گئے سکیورٹی پلان پر مکمل عمل درآمد کیا جا رہا ہے۔انہوں نے کہا کہ رمضان المبارک میں سحری، افطار اور ہر نماز کے وقت سکیورٹی ہائی الرٹ رکھی گئی ہے، جبکہ خصوصی سکیورٹی پلان کے تحت اضافی اقدامات بھی کیے جا رہے ہیں۔

ان کا کہنا تھا کہ شہریوں کی حفاظت ہماری اولین ترجیح ہے اور ہم اس بات کو یقینی بنا رہے ہیں کہ رمضان المبارک میں کسی بھی ناخوشگوار واقعے سے بچائو کے لیے فول پروف انتظامات کیے جائیں۔انہوں نے عوام سے اپیل کی کہ وہ پولیس کے ساتھ مکمل تعاون کریں اور کسی بھی مشکوک سرگرمی کی فوری اطلاع متعلقہ حکام کو دیں تاکہ شہر میں امن و امان کی فضا برقرار رکھی جا سکے۔

Short Link: https://urdu.app.com.pk/urdu/?p=571883