کراچی۔ 02 اکتوبر (اے پی پی):سری لنکا کی انڈر19کرکٹ ٹیم 12 اکتوبر کو پاکستان پہنچے گی،وہ اپنے اس دورے میں پاکستان انڈر 19کے خلاف ایک چار روزہ اور پانچ ون ڈے میچز کھیلے گی،تمام چھ میچز15سے31اکتوبر تک کراچی کے نیشنل اسٹیڈیم میں کھیلے جائیں گے۔
پاکستان کرکٹ بورڈ سے پیر کو یہاں جاری اعلامیہ کے مطابق سری لنکن ٹیم کے دورے کا آغاز 15اکتوبرکو چار روزہ میچ سے ہوگا ، اس کے بعد 22سے31اکتوبر تک ون ڈے سیریز کھیلی جائے گی جس کے میچز صبح ساڑھے نو بجے شروع ہونگے۔آئی سی سی انڈر 19ورلڈ کپ کے لیے مقرر کیے گئے قواعد وضوابط کے تحت وہی کھلاڑی منتخب ہونگے جن کی تاریخ پیدائش یکم ستمبر 2004 ء یا اس کے بعد ہوگی۔ یہ پاکستان انڈر19ٹیم کی اس سال دوسری دو طرفہ سیریز ہوگی۔اپریل میں پاکستان انڈر 19نے بنگلہ دیش کا دورہ کیا تھا جس میں ایک چار روزہ،
ایک ٹی ٹوئنٹی اور پانچ ون ڈے میچ کھیلے تھے اورتینوں فارمیٹس کی سیریز جیتی تھی جس میں ون ڈے سیریز کی چار ایک کی جیت قابل ذکر ہے ۔گزشتہ نومبر میں بنگلہ دیش کی انڈر19 ٹیم نے پاکستان کا دورہ کیا تھا اور ایک چار روزہ ، تین ون ڈے اور دو ٹی ٹوئنٹی میچز ملتان میں کھیلے گئے۔پاکستان کرکٹ بورڈ کے ڈائریکٹر انٹرنیشنل کرکٹ عثمان واہلہ نے کہا کہ وہ سری لنکن انڈر19ٹیم کو خوش آمدید کہتے ہیں، یہ سیریز نوجوان کرکٹرز کو اپنی صلاحیتوں کے اظہار کا بھرپور موقع فراہم کرے گی اور انہیں آئی سی سی انڈر19ورلڈ کپ کے لیے مفید تجربہ حاصل ہوگا۔
انہوں نے کہا کہ ہماری انڈر 19ٹیم نے حال ہی میں بہترین پرفارمنس دی ہے اور یہ ہوم سیریز پاکستان کرکٹ بورڈ کے وژن کی عکاسی کرتی ہے کہ وہ پاکستان کرکٹ کے مستقبل کے اسٹارز کو ان کی صلاحیتیں نکھارنے کے لیے بھرپور مواقع فراہم کررہا ہے۔ امید ہے کہ یہ سیریز کھیل کی بہترین اسپرٹ کے ساتھ کھیلی جائے گی۔دورے کے شیڈول کے مطابق 12اکتوبرکو سری لنکا انڈر19ٹیم پاکستان پہنچے گی، 15سے18اکتوبرتک چار روزہ میچ کھیلا جائے گا جس کے بعد پانچ ون ڈے میں 22، 24،27،29 اور 31اکتوبرکو کھیلے جائیں گے۔بعدازاں سری لنکن انڈر19ٹیم یکم نومبر کو وطن واپس روانہ ہوجائے گی۔
Short Link: https://urdu.app.com.pk/urdu/?p=397198
