ریاض۔1نومبر (اے پی پی):سعودی عرب کے وزیر برائے اقتصادیات اور منصوبہ بندی فیصل الابراہیم نے کہا ہے کہ سعودی عرب عالمی طاقت بننے کے لیے ابھرتی ہوئی ٹیکنالوجیز خاص طور پر مصنوعی ذہانت کو اپنانے میں قیادت کی طرف کی گئی رہنمائی میں مسلسل ترقی کررہی ہے۔
العربیہ اردو کے مطابق انہوں نے ریاض میں فیوچر انویسٹمنٹ انیشی ایٹو کی آٹھویں سالانہ کانفرنس سے خطاب کے دوران کہا کہ جو چیز سعودی عرب کو ممتاز کرتی ہے وہ نہ صرف یہ کہ وہ مشرق وسطیٰ کی سب سے بڑی معیشت ہے بلکہ یہ ایک قابل اعتماد عالمی شراکت دار بھی ہے۔مملکت چیلنجز کو حقیقی مواقع میں تبدیل کرنے کی صلاحیت رکھتی ہے۔
انہوں نے کہا کہ ہم طویل عرصے سے چیلنجز کو مواقع میں تبدیل کرنے کے لیے ایک قابل اعتماد پارٹنر رہے ہیں۔ یہ اعتماد اور بھروسہ اس وجہ سے نہیں کہ ہم کیا کہتے ہیں بلکہ اس وجہ سے ملا ہے کہ ہم کیا کرتے ہیں۔ انہوں نے وضاحت کی کہ مملکت وعدوں سے مطمئن ہونے کے بجائے جدید ٹیکنالوجی کی حمایت کرنے والے ممالک میں سب سے آگے رہنے کے لیے ٹھوس اقدامات کر رہی ہے۔انہوں نے اس بات پر زور دیا کہ سعودی عرب نے کام کا ایک مربوط ماحول بنایا ہے جو جدت کی حمایت کرتا ہے۔ واضح ریگولیٹری حل فراہم کرتا ہے، سرمایہ کاری کے لیے کشش کو بڑھاتا ہے اور اسے عالمی منڈی کی ضروریات کے مطابق تکنیکی حل فراہم کرنے کے لیے اہل بناتا ہے۔
