لاہور۔11اپریل (اے پی پی):سپورٹس بورڈ پنجاب کے زیر اہتمام نیشنل گیمز کیلئے کھلاڑیوں کے ٹرائلز تیسرے روز بھی جاری رہے۔ ٹرائلز کے پہلے دو دن میں پنجاب کے تمام ڈویژن سے 1420کھلاڑیوں نے شرکت کی ،صرف اتھلیٹکس میں 600سے زائد کھلاڑی شریک ہوئے۔ ٹرائلز کے پہلے دن 600سے زائد کھلاڑیوں نے شرکت کی ، ٹرائلز کے تیسرے روز ہاکی، ٹیبل ٹینس، ووشو، رسہ کشی اور سوئمنگ کے ٹرائلز منعقد ہوئے۔ ڈی جی سپورٹس پنجاب خضرافضال چوہدری نے ٹرائلز کا معائنہ کیا اورسلیکشن کمیٹیوں کی کارکردگی کا جائزہ لیا۔
ڈی جی سپورٹس پنجاب نے اس موقع پر کہا کہ 35ویں نیشنل گیمزکراچی کیلئے سپورٹس بورڈ پنجاب کے ٹرائلز اختتامی مراحل میں داخل ہوگئے ہیں،باکسنگ کے علاوہ باقی تمام گیمز کے ٹرائلز مکمل ہوچکے ہیں ، باکسنگ کے ٹرائلز 12اپریل کونشترپارک سپورٹس کمپلیکس میں ہوں گے،نیشنل گیمز کے ٹرائلز میں کھلاڑیوں کی بڑی تعداد میں شرکت خوش آئند ہے،ٹرائلز کا مقصد بہترین کھلاڑی سامنے لانا ہے۔ انہوں نے مزید کہا کہ مجھے یقین ہے پنجاب کے کھلاڑی نیشنل گیمز میں میڈلز حاصل کریں گے۔
Short Link: https://urdu.app.com.pk/urdu/?p=580827
