اسلام آباد۔19مارچ (اے پی پی):سپیکر قومی اسمبلی اسد قیصر نے کہا ہے کہ ٹائمز ہائیر ایجوکیشن کے تحت ابھرتی ہوئی معیشتوں کی جامعات میں 150 واں پوزیشن حاصل کرنا عبد الولی خان یونیورسٹی مردان کی ایک قابل ستائش کامیابی ہے،یونیورسٹی کا اپنے قیام کے قلیل عرصہ میں یہ اعزاز حاصل کرنا یونیورسٹی کی انتظامیہ، اساتذہ اور طلبہ کی لگن اور محنت کا مظہر ہے۔ ان خیالات کا اظہار انہوں نے جمعہ کو یہاں عبدالولی خان یونیورسٹی کے وائس چانسلر پروفیسر ڈاکٹر ظہور الحق اور ان کی ٹیم سے ایک ملاقات میں کیا۔
انہوں نے یونیورسٹی کے وائس چانسلر، اساتذہ اور طلبہ کو اس کامیابی پر مبارکباد بھی دی۔ اسپیکر اسد قیصر نے کہا کہ صنعتی ترقی کسی بھی قوم کی معاشی خوشحالی اور کامیابی کی کلید ہے۔ انہوں نے کہا کہ سی پیک کے تحت قائم ہونے والے صنعتی منصوبوں کے مکمل فعال ھونے سے پاکستان خاص طور پر صوبہ خیبرپختونخواہ معاشی ترقی کی راہ پر گامزن ھو گا۔
انہوں نے کہا کہ اس سلسلے میں عبدالولی خان یونیورسٹی کا کردار اہم ہو گا۔ انہوں نے ملک کو درپیش معاشرتی ، معاشی ، سائنسی اور تکنیکی امور پر تحقیق کے فروغ کے لئے ریسرچ کی بہترین سہولیات کی فراہمی کے لئے اپنے ہر ممکن تعاون کا یقین دلایا۔ اسپیکر کا مذید کہنا تھا کہ معاشی اور دیگر پالیسیوں کے تجزیے سے حکومت کو ان کی آئندہ کی حکمت عملی تشکیل دینے میں مدد ملے گی۔
وائس چانسلر عبدلاولی خان یونیورسٹی پروفیسر ڈاکٹر ظہور الحق نے اسپیکر کو آگاہ کیا کہ ٹائمز ہائر ایجوکیشن نے ابھرتی ہوئی معشتوں کی جامعات کی سن 2021 کی درجہ بندی میں یونیورسٹی کو 150 واں درجہ دیا گیا ہے۔ انہوں نے بتایا کہ اس سے قبل یونیورسٹی ملک میں درجہ اوّل اور دنیا میں 510 نمبر پر تھی۔ پروفیسر ڈاکٹر ظہورالحق نے بتایا کہ تحقیقی کارکردگی کی بنیاد پر عبدلاولی خان یونیورسٹی کو عالمی درجہ بندی میں 200 واں مقام حاصل ہے۔
انہوں نے مزید کہا کہ یہ یونیورسٹی ایشیاء میں 24 ویں اور جنوبی ایشیاء میں تیسری پوزیشن پر ہے۔ انہوں نے کہا کہ یہ کامیابی یونیورسٹی کے اساتذہ اور محققین کی انتھک محنت کا ثمر ہے۔ انہوں نے اسپیکر اسد قیصر اور خیبرپختونخواہ کی صوبائی حکومت کا یونیورسٹی کو مطلوبہ وسائل کی دستیابی اور تعاون کے لیے ان کے تعاون پر ان کا شکریہ ادا کیا۔
بعدازاں وائس چانسلر نے اسپیکر کو یونیورسٹی کا سووینئر پیش کیا۔ اس موقع ہر سینٹر شبلی فراز اور ممبر قومی اسمبلی انور تاج بھی موجود تھے۔
Short Link: https://urdu.app.com.pk/urdu/?p=244527
