راولپنڈی۔15مئی (اے پی پی):خصوصی کور کمانڈرز کانفرنس نے سیاسی محرکات کے حامل شرپسندوں کی جانب سے جلائو گھیرائو اور فوجی تنصیبات پر حملوں کی شدید ترین الفاظ میں مذمت کرتے ہوئے شرپسندی میں ملوث افراد کو پاکستان آرمی ایکٹ اور آفیشل سیکرٹ ایکٹ کے تحت ٹرائل کے ذریعے انصاف کے کٹہرے میں لانے کا اعادہ کیا ہے اور کہا ہے کہ ناقابل تردید شواہد کی بنیاد پر افواج پاکستان ان حملوں کے منصوبہ سازوں، اکسانے والوں اور ان کی حوصلہ افزائی کرنے والے تمام مجرموں سے بخوبی واقف ہیں، قیام امن و امان کیلئے رکاوٹ ڈالنے والوں سے آہنی ہاتھوں سے نمٹا جائے گا۔
موجودہ حالات کے تناظر میں خصوصی کور کمانڈرز کانفرنس چیف آف آرمی سٹاف جنرل سید عاصم منیر کی زیر صدارت پیر کو جی ایچ کیو میں ہوئی ۔ فورم کے شرکاء کو بتایا گیا کہ آرمی کے رینک اینڈ فائل میں عسکری تنصیبات کے نقصانات اور جلائو گھیرائو پر شدید غم و غصہ پایا جاتا ہے۔ پاک فوج کے شعبہ تعلقات عامہ سے جاری بیان کے مطابق خصوصی کور کمانڈرز کانفرنس کو بریفنگ کے دوران بتایا گیا کہ ناقابل تردید شواہد کی بنیاد پر افواجِ پاکستان ان حملوں کے منصوبہ سازوں، اُکسانے والوں اور ان کی حوصلہ افزائی کرنے والے تمام مجرموں سے بخوبی آگاہ ہیں۔کور کمانڈرز نے فوجی تنصیبات پر حملہ کرنے والے افراد کو پاکستان آرمی ایکٹ اور آفیشل سیکرٹ ایکٹ کے تحت ٹرائل کے ذریعے انصاف کے کٹہرے میں لانے کا اعادہ کیا۔ کانفرنس میں گزشتہ دنوں کے دوران امن و امان کی صورتحال کا جائزہ لیا گیا جو وابستہ سیاسی مفادات کے حصول کیلئے پیدا کی گئی۔
کور کمانڈرز نے اس عزم کا بھی اظہار کیا کہ کسی بھی حلقے کی جانب سے قیام امن و امان کیلئے رکاوٹ ڈالنے والوں سےآہنی ہاتھوں سے نمٹا جائے گا۔ بریفنگ کے دوران فورم کو آگاہ کیا گیا کہ شہداء کی یادگاروں کی بے حرمتی، تاریخی عمارتوں کو نذر آتش کرنے اور فوجی تنصیبات کی توڑ پھوڑ پر مشتمل ایک مربوط منصوبے پر عمل درآمد کرایا گیاتاکہ ادارے کی بدنامی ہو سکے جبکہ یہ سارا عمل سیاسی محرکات کے حامل ایجنڈے کے حصول کیلئے تھا۔ آرمی چیف نے اس سارے معاملے پر فوجی فارمیشنز کی جانب سے تحمل اور پختہ ردعمل کو سراہا۔ فورم نے واضح کیا کہ کسی بھی ایجنڈہ کے تحت فوجی تنصیبات اور مقامات پر حملہ کرنے والوں کے خلاف کوئی رعایت نہیں برتیں گے۔ کانفرنس کے شرکاء نے بیرونی طور پر سپانسر شدہ اور اندرونی سہولت یافتہ عناصر کے منظم پروپیگنڈہ پر بھی شدید تشویش کا اظہار کیا اور واضح کیا کہ شرمناک پروپیگنڈہ کا مقصد مسلح افواج اور پاکستان کی عوام کے درمیان خلیج جبکہ مسلح افواج کے رینک اینڈ فائل کے اندر دراڑ پیدا کرنا ہے۔
فورم کا کہنا تھا کہ دُشمن قوتوں کےمذموم پروپیگنڈہ کو عوام کی حمایت سے شکست دی جائے گی۔ کانفرنس کے شرکاء نے اس عزم کا بھی اعادہ کیا کہ افواج پاکستان عوام کی بھرپور حمایت سے پاکستان کے دشمنوں کے ایسے تمام مذموم عزائم کو ناکام بنائیں گی۔ فورم نے موجودہ غیر مستحکم سیاسی صورتحال میں قومی سطح پرتمام سٹیک ہولڈرز کے اتفاق رائے کی ضرورت پر زور دیا تاکہ عوام کے اعتماد، معاشی ترقی اور جمہوری نظام کو دوام بخشا جا سکے۔ کانفرنس کے شرکاء نے شہدائے پاکستان کو زبردست خراج تحسین پیش کیا جنہوں نے دہشتگردی کے جڑ سے خاتمے کے لئے دفاع وطن اور اس قوم پر اپنی جانیں نچھاور کر دیں۔ کانفرنس کے شرکاء نے بلوچستان میں مسلم باغ حملے کا بھرپور جواب دینے اور شہید ہونے والے جوانوں کی عظیم قربانیوں کو بھی زبردست خراج تحسین پیش کیا۔
Short Link: https://urdu.app.com.pk/urdu/?p=363545
