لاہور۔8فروری (اے پی پی):وزیر اعلی پنجاب کی ہدایات پر پوٹھوہار ریجن میں زرعی ترقی کیلئے ٹرانسفارمیشن پلان تیار کیا جا رہا ہے۔ یہ بات سیکرٹری زراعت پنجاب افتخار علی سہو نے کمشنر آفس راولپنڈی میں منعقدہ خصوصی اجلاس کی صدارت کرتے ہوئے کہی۔اجلاس میں موجودہ موسمی حالات کے پیش نظر گندم و دیگر فصلات کی صورتحال کا جائزہ لیا گیا۔
اجلاس میں کمشنر راولپنڈی ڈویژن انجنیئر محمد عامر خٹک اور ایڈیشنل ڈپٹی کمشنر(ریونیو) راولپنڈی نبیل سندھوسمیت دیگرافسران نے شرکت کی جبکہ ڈپٹی کمشنر اٹک را عاطف رضا، ڈپٹی کمشنر چکوال قرا العین ملک،ڈپٹی کمشنر جہلم میثم عباس اور ڈپٹی کمشنر مری آغا ظہیر عباس شیرازی بذریعہ ویڈیو لنک شریک ہوئے۔اس موقع پر سیکرٹری زراعت نے کہا کہ ٹرانسفارمیشن پلان کی تیاری کے لیے عوامی نمائندوں و دیگر سٹیک ہولڈرز کو آن بورڈ لیا جائے گا۔
انہوں نے مزید کہا کہ راولپنڈی ڈویژن میں کل قابل کاشت رقبہ 25 لاکھ ایکڑ سے زائد ہے۔امسال راولپنڈی ڈویژن میں 15 لاکھ ایکڑ سے زائدرقبہ پر گندم کاشت ہوئی۔راولپنڈی ڈویژن میں جزوی رقبہ کے علاوہ گندم کی فصل کی صورتحال اطمینان بخش ہے۔ اس موقع پر سیکرٹری زراعت پنجاب نے متعلقہ افسران کو ہدایات دیتے ہوئے کہا کہ راولپنڈی ڈویژن میں طویل خشک موسم کے باعث گندم کی فصل پر منفی اثرات مرتب ہو سکتے ہیں۔
گندم کو موجودہ موسمی حالات سے محفوظ رکھنے کیلئے کاشتکاروں کی رہنمائی کی جائے۔شعبہ اصلاح آبپاشی بارانی علاقوں میں خشک سالی سے نبرد آزما ہونے کیلئے ہنگامی پلان تیار کرے۔اس کے علاوہ محکمہ زراعت پنجاب کی تمام متعلقہ فیلڈ فارمیشنز کاشتکاروں کی رہنمائی میں متحرک کردار ادا کریں۔
انہوں نے مزید کہا کہ بارانی علاقوں میں سمال ڈیمز،منی ڈیمز اور تالابوں سے گندم کی آبپاشی کیلئے فوری انتظامات کئے جائیں اور باغات کی آبپاشی کے لیے نصب شدہ ڈرپ ایریگیشن سسٹم کی کارکردگی کا جائزہ لیا جائے۔سیکرٹری زراعت پنجاب نے کہا کہ اس مہم کے دوران ڈویژنل اور ضلعی انتظامیہ کا بھرپور تعاون حاصل رہے گا۔
Short Link: https://urdu.app.com.pk/urdu/?p=557657
