پیانگ یانگ۔10مارچ (اے پی پی):شمالی کوریا نے امریکا اور جنوبی کوریا کی طرف سے بڑے پیمانے پر کی جانے والی مشترکہ فوجی مشقوں کی مذمت کی ہے۔ شنہوا کے مطابق کوریا کی سرکاری نیوز ایجنسی (کے سی این اے )نے وزارت خارجہ کے پریس اینڈ انفارمیشن ڈیپارٹمنٹ کی طرف سے جاری بیان کا حوالہ دیتے ہوئے کہا کہ شمالی کوریا کے بار بار کے انتباہ کے باوجود امریکا اور جنوبی کوریا مسلسل بڑے پیمانے پر مشترکہ فوجی مشقیں کر رہے ہیں جو جزیرہ نما کوریا میں صورتحال کو سنگین بنا نے کا ایک خطرناک اور اشتعال انگیز عمل ہے۔
بیان میں کہا گیا کہ امریکا کے اشتعال انگیز اقدامات کی وجہ سے شمالی کوریا اور امریکا کے درمیان سیاسی اور فوجی تصادم خطرناک حد تک پہنچ گیا ہے جس کا براہ راست ہدف شمالی کوریا ہےاور تصادم کا انداز تیزی سے خطرناک ہوتا جا رہا ہے۔ جنوبی کوریا کی یونہاپ نیوز ایجنسی کے مطابق جنوبی کوریا اور امریکا نے پیر کو سالانہ مشترکہ فوجی مشق’’فریڈم شیلڈ‘‘ کا آغاز کیا۔ 11 روزہ مشقوں میں اتحادیوں کے درمیان باہمی تعاون کو مضبوط بنانے کے لئے کمپیوٹر پر مشقیں اور فیلڈ ٹریننگ شامل ہے۔
Short Link: https://urdu.app.com.pk/urdu/?p=570701
