شہباز حکومت کا ایک سال، استحکام، ترقی اور کامیابی کا سفرہے،وزیر مملکت بیرسٹر عقیل ملک

اسلام آباد۔4مارچ (اے پی پی):وزیر مملکت بیرسٹر عقیل ملک نے کہا ہے کہ شہباز حکومت کا ایک سال، استحکام، ترقی اور کامیابی کا سفرہے، جب شہباز شریف نے حکومت سنبھالی، تو پاکستان ڈیفالٹ کے دہانے پر تھا، معیشت زبوں حالی کا شکار تھی، اپوزیشن مسلسل یہ دعوے کر رہی تھی کہ ملک سری لنکا کی طرح دیوالیہ ہو جائے گا، مگر آج، صرف ایک سال بعد، وہ تمام پیش گوئیاں غلط ثابت ہو چکی ہیں، مخالفین بھی ماننے پر مجبور ہیں کہ وزیراعظم شہباز شریف نے پاکستان کی معیشت کو ایک مشکل دور سے نکال کر ترقی کی راہ پر گامزن کر دیا ہے۔

منگل کو حکومت کا ایک سال مکمل ہو نے پر اپنے ٹویٹ میں بیرسٹر عقیل ملک نے کہا کہ معاشی استحکام کے نمایاں اشاریوں میں افراط زر 38فیصد سے کم ہو کر 2.4فیصد پر آ گئی،شرح سود 22فیصد سے گھٹ کر 12فیصد ہو گئی، زرمبادلہ کے ذخائر 16 ارب ڈالر سے تجاوز کر گئے، سٹاک مارکیٹ 118,000 پوائنٹس عبور کر چکی ہے۔وزیر مملکت بیرسٹر عقیل ملک نے کہا کہ کرنٹ اکاؤنٹ سرپلس 1.2 ارب ڈالر ہوگیا، ترسیلات زر 30 ارب ڈالر سے بڑھ کر 35 ارب ڈالر تک پہنچیں،روشن ڈیجیٹل اکاؤنٹ میں سرمایہ کاری 9.1 ارب ڈالر تک جا پہنچی، آئی ایم ایف کا اعتماد بحال، عالمی کریڈٹ ریٹنگ ایجنسیوں نے مثبت جائزہ دیا۔

انہوں نے کہا کہ یہ سب وزیرعظم شہباز شریف کی قیادت میں اتحادی حکومت کے سخت اور ضروری معاشی فیصلوں کے باعث ممکن ہوا، سمگلنگ کی روک تھام، کرپشن کے خلاف اقدامات، اور مالیاتی نظم و ضبط قائم ہوا، جس کی بدولت آج پاکستان میں کاروباری اعتماد بحال ہو چکا ہے۔ انہوں نے کہا کہ حکومت کے بروقت فیصلوں نے ملک کو بحران سے نکال کر ترقی کے سفر پر گامزن کر دیا۔

Short Link: https://urdu.app.com.pk/urdu/?p=568476