ملتان۔ 05 مئی (اے پی پی):وزیراعلیٰ پنجاب مریم نواز کی ہدایت پر شہریوں کو صاف پانی کی فراہمی کیلئے ڈویژنل انتظامیہ متحرک ہے ۔اس سلسلے میں کمشنرملتان ڈویژن عامر کریم خاں کی زیر صدارت پنجاب صاف پانی اتھارٹی کا جا ئزہ اجلاس منعقدہواجس میں صاف پانی اتھارٹی کو ڈویژن بھر میں واٹر سروے کی ہدایت کی اورکہاکہ ترجیحات کا ازسرِ نو تعین کیاجائے۔انہوں نے کہاکہ صاف پانی بیماریوں سے بچاؤاور ادویات کے بڑھتے اخراجات سے نجات کا ذریعہ ہے، صاف پانی کی فراہمی سے ہیپاٹائٹس، ہیضہ اور دیگر بیماریوں سے بچاؤممکن ہے، پہلے سے موجود 165 واٹر فلٹریشن پلانٹس کی بحالی و اپ گریڈیشن،عوام کو صاف پانی کی سہولت میسر آئے گی۔
اس موقع پرانہیں بریفنگ میں بتایاگیا کہ لودھراں میں195 مرکز آب، 276 دیہات کو صاف پانی کی فراہمی کا منصوبہ زیرغورہے جوعلاقائی ترقی کی نئی راہ ہموار کرے گا۔اجلاس میں انہیں بتایاگیاکہ ڈویژن میں خانیوال 10فیصد، لودھراں 32فیصد، وہاڑی 12فیصد اور ملتان میں 9فیصد پانی غیر معیاری قراردیاجاچکاہے۔اجلاس میں بتایاگیاکہ زیادہ ٹی ڈی ایس والے علاقوں میں واٹرٹریٹمنٹ اورآراو پلانٹس کی تجویز اورکنٹرول ٹی ڈی ایس علاقوں میں الٹرا فلٹریشن پلانٹس لگانے پر غور کیاجارہاہے ۔
اجلاس میں ڈپٹی کمشنرز، میونسپل و ضلع کونسل افسران سمیت متعلقہ محکمے شریک تھے ۔
Short Link: https://urdu.app.com.pk/urdu/?p=592641
