راولپنڈی۔7ستمبر (اے پی پی):ریجنل پولیس آفیسر سید خرم علی نے کہا ہے کہ راولپنڈی کے شہریوں کی جان و مال کی حفاظت اولین ترجیح ہے جس کے پیش نظر جلوس کی موثر سکیورٹی کے لئے تمام اقدامات اٹھائے گئے ہیں،چہلم حضرت امام حسین رضی اللہ تعالیٰ عنہ کے مرکزی جلوس کی مانیٹرنگ ضلعی انتظامیہ اور پولیس کے اعلیٰ افسران کی سربراہی میں کی جارہی ہے،جلوس میں شرکت کرنے والے تمام افراد کی جامع تلاشی لی گئی اور مشکوک عناصر پر کڑی نظر رکھی جا رہی ہے ۔
ان خیالات کا اظہار آر پی او سید خرم علی نے جمعرات کو راولپنڈی میں چہلم حضرت امام حسین رضی اللہ تعالیٰ عنہ کے مرکزی جلوس کا دورہ کرتے ہوئے کیا۔اس موقع پر ان کے ہمراہ سی پی او سید خالد ہمدانی،ڈپٹی کمشنر حسن وقار چیمہ اور سکیورٹی وقانون نافذ کرنے والے اداروں کے سینئر افسران بھی موجود تھے۔پولیس و ضلعی انتظامیہ کے افسران نے کنٹرول روم کا دورہ کیا اور جلوس کے لیے کیے گئے سکیورٹی انتظامات کا جائزہ لیا۔آر پی او نے جلوس کے فول پروف سکیورٹی انتظامات یقینی بنانے کے لئے متعلقہ افسران کو ہدایات دیں۔
سی پی او سید خالد ہمدانی نے کہاکہ مرکزی و دیگر جلوسوں کی سکیورٹی کے لئے 4000 سے زائد افسران و اہلکار فرائض سر انجام دیں گے،ٹریفک کے موثر انتظامات کے لئے 250 ٹریفک افسران و اہلکار خصوصی طور پر تعینات کئے گئے ہیں، جلوس میں داخلے کے وقت باڈی سرچ اور واک تھرو گیٹس سے چیکنگ کی جارہی ہے، روف ٹاپ پر ماہر نشانہ باز تعینات کئے گئے ہیں،سینئر پولیس افسران لمحہ بالمحہ ڈیوٹی کو چیک اور بریف کر رہے ہیں،جلوس کے فول پروف سکیورٹی انتظامات کو یقینی بنایا جارہے۔
Short Link: https://urdu.app.com.pk/urdu/?p=387952
