لاہور۔13ستمبر (اے پی پی):لیسکو چیف انجینئر شاہد حیدر نے بدھ کو ای کچہری میں فیس بک کے لائیو سیشن کے ذریعے صارفین کی شکایات سنیں اور شکایات کے فی الفور ازالے کے لئے موقع پر ہی احکامات جاری کئے۔ لیسکو ای کچہری میں ڈائریکٹر ایچ آر آضیہ شعیب، ڈی جی امپلیمنٹیشن ضمیر حسین کلاچی، ڈی جی فنانس جاوید اور منیجر کمپلینٹ سیل معصومہ بھی موجود تھیں جبکہ لیسکو کے تمام سرکلز کے ایس ایز نے بھی آن لائن شرکت کی۔
لیسکو کی جانب سے منعقد ہ ای کچہری میں ریجن کے تمام سرکلز کے صارفین بھی اپنے مسائل کے بروقت حل کے لئے بھرپور شرکت کرتے ہیں۔ لیسکو کی ای-کچہری میں مختلف نوعیت کی شکایات موصول ہوئیں جن میں زیادہ تر شکایات نئے میٹرز کی تنصیب اور خراب میٹروں کی تبدیلی میں تاخیر سے متعلق شکایات شامل ہیں۔لیسکوچیف نے موصول شکایات پر متعلقہ افسران کو ہدایات جاری کئیں۔
لیسکو چیف نے تمام افسران پر زور دیا کہ صارفین کی شکایات کے ازالے کو مکمل طور پر یقینی بنایا جائے۔لیسکو چیف نے صارفین سے بھی درخواست کی کہ بجلی کی بلا تعطل سپلائی کو یقینی بنانے کے لئے اپنے بجلی بلوں کی بروقت ادائیگی کریں۔واضح رہے کہ ہر ماہ لیسکو چیف اپنی ٹیم کے ہمراہ فیس بک پیج LESCO PMDU کے ذریعے عوام کی شکایات وصول کرتے ہیں جن کے فی الفور ازالے کو ہر ممکن طور پر یقینی بنایا جاتا ہے۔
ای کچہری کے دوران صارفین کا اپنے پیغامات میں کہنا تھا کہ لیسکو چیف کامیاب ای کچہری کے انعقاد پر مبارکباد کے مستحق ہیں جن کی وجہ سے صارفین کو اپنی شکایات کے بروقت ازالے کے لئے ایک ایسا فورم ستیاب ہے جہاں وہ باآسانی بنا دفاتر کے چکر لگائے اپنی شکایات کو درج کرواکر ریلیف حاصل کرسکتے ہیں۔
Short Link: https://urdu.app.com.pk/urdu/?p=390211
