اسلام آباد۔31جولائی (اے پی پی):ڈیجیٹل پلیٹ فارمز پر ہراسانی کے خلاف اہم قدم اٹھاتے ہوئے صدرِ مملکت نے خواتین کو کام کی جگہ پر ہراسانی سے بچانے کے قانون (2010) کے تحت وفاقی محتسب برائے انسدادِ ہراسانی (فوسپاہ) کے فیصلے کو برقرار رکھا ہے۔
یہ کیس سٹیٹ لائف انشورنس کارپوریشن آف پاکستان میں ایک اعلیٰ عہدیدار کے خلاف تھا۔جمعرات کو وفاقی محتسب سیکرٹریٹ سے جاری بیان کے مطابق شکایت کنندہ عروج واحد نے شکایت درج کرائی تھی کہ سٹیٹ لائف کے اسسٹنٹ جنرل منیجر، کامران چنہ نے انہیں واٹس ایپ اور دیگر ڈیجیٹل ذرائع سے نازیبا اور نامناسب پیغامات بھیجے جن میں جنسی نوعیت کے جملے شامل تھے۔
کامران چنہ نے پیغامات بھیجنے کا اعتراف تو کیا لیکن فوسپاہ کے اس فیصلے کو چیلنج کیا جس میں انہیں نوکری سے برطرف کرنے اور 3 لاکھ روپے جرمانہ عائد کرنے کا حکم دیا گیا تھا۔ انہوں نے صدرِ پاکستان کے پاس اپیل دائر کی۔صدر کے سامنے پیشی کے دوران کامران چنہ نے بغیر کسی مزید وضاحت کے نہ صرف عروج واحد بلکہ ان کی والدہ سے بھی غیر مشروط معافی مانگی۔ دونوں فریقین کو سننے کے بعد، صدر نے ہراسانی کے الزامات کو درست قرار دیا مگر چنہ کی 29 سالہ بے داغ سروس کو دیکھتے ہوئے انہیں برطرف کرنے کی سزا کو جبری ریٹائرمنٹ میں تبدیل کر دیاتاہم صدرِ پاکستان نے متاثرہ خاتون کے ساتھ ہمدردی کا مظاہرہ کرتے ہوئے اُن کے لئے ہرجانے کی رقم 3 لاکھ سے بڑھا کر 10 لاکھ روپے کر دی کیونکہ عروج واحدکو اس ہراسانی کے باعث ذہنی دباؤ اور مجبوری میں نوکری چھوڑنی پڑی۔
صدرِ پاکستان نے اسٹیٹ لائف کو یہ بھی ہدایت کی ہے کہ عروج واحد کو دوبارہ نوکری پر رکھا جائے، کیونکہ ان کا استعفیٰ رضاکارانہ نہیں تھا بلکہ اُس ماحول کا نتیجہ تھا جو ہراسانی کے باعث پیدا ہوا۔یہ فیصلہ ایک واضح پیغام دیتا ہے کہ واٹس ایپ یا سوشل میڈیا جیسے ڈیجیٹل ذرائع کے ذریعے کی جانے والی ہراسانی بھی اُتنی ہی سنگین ہے جتنی کہ ذاتی طور پر کی جانے والی بدسلوکی اور یہ قانون کے مطابق قابلِ سزا جرم ہے۔ اس کیس نے آن لائن بدسلوکی کے خلاف ایک اہم مثال قائم کی ہے۔
