اسلام آباد۔30نومبر (اے پی پی):صدر آزاد جموں وکشمیر بیرسٹر سلطان محمود چوہدری نے کہا ہے بیرون ملک آباد کشمیری بالخصوص امریکہ میں مقیم کشمیریوں نے ہمیشہ مسئلہ کشمیر کو عالمی سطح پر ا ُجاگر اورزندہ رکھا ہے ،میں ان کی کاوشوں پر مقبوضہ کشمیر کے عوام کی طرف سے سلام پیش کرتا ہوں ۔
امریکہ میں مقیم کشمیری ہر سال ستمبر میں اقوام متحدہ کی جنرل اسمبلی کے اجلاس کے موقع پر نیو یارک میں اقوام متحدہ کے دفتر کے سامنے کشمیریوں کے حق میں احتجاجی مظاہرے کرتے ہیں اور اقوام عالم کی توجہ اقوام متحدہ کی قراردادوں کے مطابق مسئلہ کشمیر کے حل اور مقبوضہ کشمیر میں جاری بھارتی مظالم کی طرف دلاتے ہیں۔ ان خیالات کا اظہار انہوں نے جمعرات و یہاں ایوان صدر کشمیر ہاؤس اسلام آبادمیں چیئرپرسن فرینڈز آف کشمیر انٹرنیشنل (امریکہ) غزالہ حبیب کی قیادت میں ایک وفد سے تفصیلی ملاقات میں کیا۔اس موقع پر وفد میں چیئرپرسن فرینڈز آف کشمیر انٹرنیشنل (امریکہ) غزالہ حبیب کے علاوہ حریت رہنماء عبدالحمید لون،عبدالحفیظ خان اور طارق احمد بھی موجود تھے۔
اس موقع پر صدر آزادجموں وکشمیر بیرسٹر سلطان محمود چوہدری نے وفد کو مزید بتایا کہ بھارت مقبوضہ کشمیر میں آئے روز ظلم و بربریت میں اضافہ کر رہا ہے اور وہاں پر انسانی حقوق کی پامالی عروج پر ہے ایسے میں بیرون ملک آبادکشمیری بالخصوص امریکہ میں آباد کشمیریوں کے ساتھ مل کر ہمیں بھارت اور مودی سرکار کے ان گھناؤنے عزائم کو انٹرنیشنل کمیونٹی کے سامنے بے نقاب کرنا ہو گا۔صدر آزادجموں وکشمیر بیرسٹر سلطان محمود چوہدری نے کہا کہ بھارت نے 5اگست2019ء کے بعد سے مقبوضہ کشمیر میں مظالم کے پہاڑ توڑ رکھے ہیں اور انسانی حقوق کی پامالیوں میں اضافہ کر دیا ہے جس سے مقبوضہ کشمیر میں کشمیری عوام ایک انتہائی مشکل اور سنگین صورتحال سے گزر رہے ہیں لیکن بھارت یہ جان لے کہ وہ اپنے توپ و تفنگ سے کشمیری عوام کے جذبہ حریت کو زیر نہیں کر سکتا ،انشا ء اللہ مقبوضہ کشمیر جلد بھارتی تسلط سے آزاد ہو گا۔
اس موقع پر چیئرپرسن فرینڈز آف کشمیر انٹرنیشنل (امریکہ) غزالہ حبیب نے صدر آزادکشمیر بیرسٹر سلطان محمود چوہدری کی مسئلہ کشمیر کے حوالے سے کی جانے والی سیاسی و سفارتی کوششوں کو خراج تحسین پیش کیا اور اس بات کا یقین دلایا کہ فرینڈز آف کشمیر انٹرنیشنل (امریکہ) اور امریکہ میں مقیم کشمیری ہر فورم پرمسئلہ کشمیر کو اُجاگر کرنے کے لئے اپنی کوششیں جاری رکھیں گے اور دنیا کے سامنے بھارت کے مقبوضہ کشمیر میں انسانیت کے خلاف ان مکروہ عزائم کا پردہ چاک کریں گے۔
اس موقع پر چیئرپرسن فرینڈز آف کشمیر انٹرنیشنل (امریکہ) غزالہ حبیب نے صدر آزادکشمیر بیرسٹر سلطان محمود چوہدری کو امریکہ کے دورے کی بھی دعوت دی جو انہوں نے قبول کرتے ہوئے کہا کہ وہ جلد امریکہ کا دورہ کر کے مسئلہ کشمیر کے حل کے لئے بین الاقوامی رائے عامہ کی حمایت حاصل کریں گے۔
Short Link: https://urdu.app.com.pk/urdu/?p=415374
