صوبائی دارالحکومت لاہور سمیت صوبہ بھر میں سکیورٹی بڑھا دی گئی ہے ،ڈاکٹر عثمان انور

لاہور۔10مئی (اے پی پی):آئی جی پنجاب ڈاکٹر عثمان انور نے کہا کہ صوبائی دارالحکومت لاہور سمیت صوبہ بھر میں سکیورٹی بڑھا دی گئی ہے ،پنجاب پولیس کا ہر جوان ملک و قوم کی حفاظت کے لئے اپنی بہادر افواج، سکیورٹی اداروں کے شانہ بشانہ ہے ۔

ایک بیان میں انہوں نے کہا کہ پولیس چیک پوسٹس، چینی و غیر ملکی سفارت خانوں، حساس مقامات و تنصیبات کی سکیورٹی پہلے ہی بڑھا دی گئی تھی۔ انہوں نے کہا کہ ضلعی انتظامیہ، سول ڈیفنس اور ریسکیو 1122 سکیورٹی اداروں سے مسلسل رابطے میں رہیں جبکہ ڈولفن سکواڈ، پولیس ریسپانس یونٹ، ایلیٹ ٹیمیں اہم مقامات کے گرد پٹرولنگ بڑھا ئیں جبکہ سرچ، سویپ اینڈ کومبنگ آپریشنز سمیت فرضی مشقیں جاری رکھیں۔

ڈاکٹر عثمان انور نے کہا کہ پنجاب پولیس کسی بھی ہنگامی صورتحال میں سکیورٹی، لا اینڈ آرڈر، امدادی سرگرمیوں میں اپنی مکمل معاونت یقینی بنائے گی۔انہوں نے ہدایت کی کہ دہشت گردوں، شر پسندوں، مشکوک افراد پر کڑی نظر رکھی جائے جبکہ شہری من گھڑت افواہوں، غیر مصدقہ سوشل میڈیا پیغامات پر ہرگز دھیان مت دیں۔

Short Link: https://urdu.app.com.pk/urdu/?p=595163