لاہور۔15مارچ (اے پی پی):سیکرٹری زراعت پنجاب افتخار علی سہو نے کہاہے کہ صوبہ میں 10 لاکھ ایکڑ رقبہ پر کپاس کی اگیتی کاشت کا ہدف حاصل کیا جائے گا، پنجاب میں کپاس کی بحالی کو چیلنجنگ ٹاسک کے طور پر لیا جارہا ہے،کپاس کی اگیتی کاشت میں کاشتکاروں کا بھرپور تعاون قابل ستائش ہے،تاریخ میں پہلی بار کپاس کی اگیتی کاشت کیلئے بھرپور انداز میں مہم جاری ہے۔
ان خیالات کا اظہارانہوں نے محمد نواز شریف زرعی یونیورسٹی ملتان میں منعقدہ کپاس کی اگیتی کپاس کے ہدف کے جائزہ اجلاس کی صدارت کرتے ہوئے کیا۔اجلاس میں سپیشل سیکرٹری زراعت جنوبی پنجاب سرفراز حسین مگسی،چئیرمین نیشنل سیڈ اتھارٹی ڈاکٹر آصف علی، وائس چانسلر ایم این ایس زرعی یونیورسٹی ملتان پروفیسر ڈاکٹر اشتیاق احمد رجوانہ، ڈائریکٹر جنرلز زراعت پنجاب چوہدری عبدالحمید،نوید عصمت کاہلوں،عبدالقیوم،صدر کسان اتحاد خالد کھوکھر،کاٹن ایکسپرٹ ڈاکٹر محمد اقبال بندیشہ سمیت محکمہ زراعت و انہار کے افسران نے شرکت کی۔
اجلاس سے خطاب کرتے ہوئے سیکرٹری زراعت پنجاب نے کہا کہ موسمیاتی تبدیلیوں کے تناظر میں کپاس کی اگیتی کاشت ناگزیرہو چکی اورتاریخ میں پہلی بار کپاس کی اگیتی کاشت پر مالی اعانت کا خصوصی پیکج کاشتکاروں کو فراہم کیا جا رہا ہے۔
سیکرٹری زراعت نے واضح کیا کہ کپاس کی اگیتی کاشت کیلئے متعلقہ فیلڈ فارمیشنز کو اہداف تفویص کئے گئے ہیں،اگیتی کپاس کے ہدف کے حصول میں ناکامی کی صورت میں متعلقہ افسران و عملہ کو جواب دہ ہونا پڑے گا،کپاس کی اگیتی کاشت کیلئے آئندہ 15 دن بہت اہم ہیں،کپاس کی بحالی کیلئے ماہرین کی مشاورت سے عملی سرگرمیوں کا کیلنڈر تیار کیا جائے،فیلڈ فارمیشنز کپاس کی اگیتی کاشت کیلئے فعال عملی کردار ادا کریں۔
انھوں نے کہا کہ مارکیٹ میں معیاری زرعی مداخل کی مقررکردہ نرخوں پر دستیابی یقینی بنائی جارہی ہے۔بعد ازاں سیکرٹری زراعت پنجاب نے ملتان میں زیر تعمیر ماڈل ایگری مال کا دورہ کیا اور تعمیراتی کام کے معیار ورفتار پر اطمینان کا اظہار کیا۔
Short Link: https://urdu.app.com.pk/urdu/?p=572992
