اسلام آباد۔25اگست (اے پی پی):ڈپٹی کمشنر اسلام آباد عرفان نواز میمن کی ہدایت پر تمام اسسٹنٹ کمشنرز نے اپنے علاقوں میں ناجائز منافع خوری، تجاوزات اور پیشہ ور بھکاریوں کے خلاف کارروائیوں کے دوران 30 پیشہ ور بھکاریوں سمیت 36 افراد کو گرفتار ، ناجائزمنافع خوروں کو 26 ہزار روپے کے جرمانے عائد کر دیے ۔
ترجمان آئی سی ٹی کے مطابق اسسٹنٹ کمشنرز نے قیمتوں کی چیکنگ کے حوالے سے 105 مقامات پر معائنے کئے۔اس دوران ناجائز منافع خوروں کو 26 ہزار روپے جرمانہ عائد اور ایک دکان سیل کر دی گئی، اس کے علاوہ 30پیشہ ور بھکاریوں کو بھی گرفتار کر کے تھانے منتقل کر دیا گیا۔ ضلعی انتظامیہ نے غیر قانونی کلینکس اور شیشہ کیفیز کے خلاف بھی کارروائی کی،تجاوزات کے خلاف آپریشن میں پانچ افراد کو گرفتار کر کے تھانے منتقل کر دیا گیا۔
ضلعی انتظامیہ نے 6 کلو سے زائد پولی تھین بیگ بھی ضبط کر لئے۔مزید برآں غیر قانونی پٹرول فلنگ ایجنسیوں اور ایک غیر قانونی ایل پی جی فلنگ سٹیشن کے خلاف بھی کارروائی کی گئی۔واضح رہے کہ روزانہ کی بنیاد پر تجاوزات ، قیمتوں میں اضافے اور پروفیشنل بھکاریوں کے خلاف آپریشن جاری ہے۔
Short Link: https://urdu.app.com.pk/urdu/?p=382472
