فیصل آباد۔ 12 ستمبر (اے پی پی):ڈپٹی کمشنرعبداللہ نیئر شیخ نے کہا ہے کہ ضلعی انتظامیہ ڈینگی سے بچاؤ کیلئے بھر پور انتظامی و انسدادی اقدامات کر رہی ہے تاہم عوامی تعاون کے بغیر انسداد ڈینگی میں کامیابی ممکن نہیں لہذا شہری ڈینگی لاروا کی افزائش کے ممکنہ ذرائع کا صفایا کرنے میں اپنا کردار ادا کریں۔یہ بات انہوں نے مختلف علاقوں کے گلی محلوں میں جا کر انسداد ڈینگی اقدامات پر عملدرآمد کا جائزہ اور شہریوں سے ملاقات کرتے ہوئے کہی۔
وہ نڑوالا روڈ،غلام محمد آباداور دیگر علاقوں کی گلیوں میں گئے اور گھروں کے مکینوں سے محکمہ صحت کی انسداد ڈینگی ٹیموں اور انکی طرف سے سرویلنس کے طریقہ کارکے بارے میں دریافت کیا۔اہل علاقہ نے بتایا کہ میل اور فی میل سٹاف پر مشتمل انسداد ڈینگی ٹیموں کی طرف سے گھروں میں ایئرکولرز، فریج کی ٹرے،پانی کی ٹینکیوں، گملوں،پانی جمع کرنے کے برتنوں اور چھتوں پر کاٹھ کباڑ وغیرہ کو مسلسل چیک کیا جارہا ہے جس پرڈپٹی کمشنر نے اپنے اطمینان کا اظہار کرتے ہوئے گھروں کے مکینوں سے کہا کہ وہ شعوری انداز میں احتیاطی تدابیر پر عمل کریں کسی جگہ پانی کھڑا نہ رہے کیونکہ موجودہ موسم ڈینگی لاروا کی افرائش کے لئے موافق ہے لہذا بھر پور احتیاط اور توجہ سے اس پر قابو پایا جا سکتا ہے۔
انہوں نے کہا کہ ڈینگی لاروا کی تلفی کے لئے ہر فرد کا کردار اہم ہے لہذا ڈینگی کی آماجگاہوں کے خاتمے کے لئے شہری اپنے گھروں کے اندر صفائی ستھرائی کو یقینی بنائیں۔انہوں نے کہا کہ محکمہ صحت کی انسداد ڈینگی ٹیموں سے تعاون کیا جائے جو آؤٹ ڈور اوران ڈور سرویلنس کے لئے سرگرم عمل ہیں۔ڈپٹی کمشنر گھروں کے اندر بھی گئے اور اینٹی ڈینگی ٹیموں کی طرف سے سرویلنس کے جاری عمل کا مشاہدہ کیا۔انہوں نے رپورٹ ہونے والی ڈینگی کی مریضہ بچی کے گھر کا بھی دورہ کیا اور اس کے اہلخانہ کو احتیاطی تدابیر اپنانے کی تلقین کی۔ڈپٹی کمشنر نے نڑوالا روڈ پر بڑے قبرستان کا بھی دورہ کیااور قبرستان میں پانی کے ٹینکس کے اندر اورپرندوں کے لئے پانی کے برتنوں میں لاروا چیک کرایا۔
انہوں نے کہا کہ قبرستانوں کے باہر مین گیٹ پر ڈینگی سے بچاؤ کے لئے آگاہی بینرز آویزاں ہیں،قبرستانوں میں فاتحہ وقرآن خوانی کے لئے آنے والے قائمہ ہدایات پر عمل کریں۔انہوں نے محکمہ صحت کے متعلقہ افسران اور انسداد ڈینگی سٹاف کو خبردار کیا کہ وہ ڈینگی لاروا کی افزائش روکنے کے لئے تمام تر وسائل کے ساتھ غیر معمولی کوششیں کریں اس ضمن میں معمولی سی بھی غفلت کی گنجائش نہیں۔اسسٹنٹ کمشنر سٹی عزیرخاں،سی ای او ہیلتھ ڈاکٹر اسفند یار،ڈسٹرکٹ کوآرڈینیٹر برائے انسداد وبائی امراض،اینٹامالوجسٹ،لوکل گورنمنٹ کے نمائندہ اور دیگر افسران بھی ان کے ہمراہ تھے۔
سی ای او ہیلتھ نے بتایا کہ ان ڈور اور آؤٹ ڈور سرویلنس کا عمل بلا تعطل جاری ہے اور ٹیموں کی کارکردگی کی بھی کڑی مانیٹرنگ کی جارہی ہے۔
Short Link: https://urdu.app.com.pk/urdu/?p=389654
