اسلام آباد۔29جون (اے پی پی):وزیر اعظم محمد شہباز شریف نے عید الاضحیٰ کے پر مسرت موقع پر پوری پاکستانی قوم اور عالم اسلام کو مبارک باد پیش کرتے ہوئے کہا ہے کہ اللہ تعالیٰ سے دعا کرتا ہوں کہ وہ پوری ملت اسلامیہ کی عبادات اور قربانیاں اپنی بارگاہ میں قبول فرمائے۔
جمعرات کو ایک ٹویٹ میں وزیر اعظم نے کہا کہ آج کے اس مقدس دن حضرت ابراہیم علیہ السلام اور حضرت اسماعیل علیہ السلام نے اللہ کی بارگاہ میں تسلیم و رضا کا اظہار کرتے ہوئے قربانی کی لازوال مثال پیش کی تھی، یہ عمل اللہ تعالی کو اتنا پسند آیا کی اسے قیامت تک امت محمد ﷺ کے لئے بطور عبادت لازم قرار دے دیا۔
انہوں نے کہا کہ یاد رکھیں! قربانی ایک رسم نہیں بلکہ ایک عالمگیر جذبہ ہے، قربانی صرف جانور ذبح کرنے کا نام نہیں ہے بلکہ اس کا مقصد اعلیٰ مقاصد کے حصول کے لئے اپنی متاع حیات کو اللہ کے راستے میں قربان کرنا ہے۔ وزیر اعظم نے کہا کہ یہ ایک حقیقت ہے کہ دنیا میں کوئی قوم اس وقت تک ترقی نہیں کرسکتی جب تک اس میں ایثار اور قربانی کا جذبہ موجود نہ ہو۔
انہوں نے کہا کہ میں اس پر مسرت موقع پر اہلیان پاکستان اور پوری دنیا کے مسلمانوں کو دل کی گہرائیوں سے پرخلوص مبارکباد پیش کرتا ہوں اور اللہ عزوجل سے دعاگو ہوں کہ وہ پاکستان پر اپنی رحمتیں نازل کرے اور ہم سب کے اعمال صالحہ کو اپنی بارگاہ میں قبول فرمائے۔ آمین
Short Link: https://urdu.app.com.pk/urdu/?p=371692
