قاہرہ۔8فروری (اے پی پی):مصر نے غزہ سے فلسطینیوں کے جبری انخلا سے متعلق تجاویز سامنے آنے کے بعد امریکا کوجواب دیتے ہوئے کہا ہے کہ فلسطینیوں کی جبری نقل مکانی ہر گز ممکن نہیں۔ العربیہ اردو کے مطابق مصر نے امریکا کو باور کرایا ہے کہ غزہ کے باشندوں کو بے گھر کرنے سے متعلق اس کا موقف تبدیل نہیں ہوگا۔ مصر اس بات پر زور دیتا ہے کہ وہ فلسطینی باشندوں کو بے گھر کیے بغیر غزہ کی تعمیر نو کا وژن رکھتا ہے اور غزہ کے باشندوں کو بے گھر کیے بغیر ان کے اندر موجود رہنے پر اصرار کرتا ہے۔
ایسوسی ایٹڈ پریس کے مطابق مصر اور اسرائیل کے درمیان تقریباً نصف صدی تک جاری رہنے والے امن معاہدے کو اب امریکی صدر ڈونلڈ ٹرمپ کے غزہ کی پٹی کے منصوبے سے خطرہ لاحق ہے۔مصری حکومت نے غزہ سے فلسطینیوں کی منتقلی کی کوششوں کو بین الاقوامی قانون کی کھلی خلاف ورزی قرار دیتے ہوئے اسے مسترد کر دیا جس سے جنگ بندی مذاکرات کو نقصان پہنچ سکتا ہے اور مشرق وسطیٰ میں تعلقات کو خطرہ لاحق ہو سکتا ہے۔مصری حکام نے نام ظاہر نہ کرنے کی شرط پر بند کمرے میں ہونے والی بات چیت پر بات کرتے ہوئے کہا کہ قاہرہ نے ٹرمپ انتظامیہ اور اسرائیل پر واضح کر دیا ہے کہ وہ ایسی کسی بھی تجویز کی مزاحمت کرے گا ۔ ایسی تجاویز پر اصرار اسرائیل کے ساتھ کیمپ ڈیوڈ امن معاہدہ کوخطرے میں ڈالنا ہے۔
ایک اہلکار نے بتایا کہ یہ پیغام امریکی محکمہ دفاع پینٹاگان، محکمہ خارجہ اور امریکی کانگریس کے ارکان کو پہنچا دیا گیا ہے۔ ایک دوسرے اہلکار نے بتایا کہ اسے اسرائیل اور مغربی یورپ میں اس کے اتحادیوں بشمول برطانیہ، فرانس اور جرمنی کو بھی منتقل کر دیا گیا ہے۔قاہرہ میں ایک مغربی سفارت کارنے اپنا نام ظاہر نہ کرنے کی شرط پر بتایا کہ انہیں متعدد چینلز کے ذریعے مصر کی سخت مخالفت کا پیغام ملا ہے۔ سفارت کار نے کہا کہ مصر بہت سنجیدہ ہے اور اس منصوبے کو اپنی قومی سلامتی کے لیے خطرہ سمجھتا ہے۔سفارت کار نے کہا کہ مصر نے 7 اکتوبر 2023 کوا سرائیل۔ فلسطین جنگ کے اوائل میں بائیڈن انتظامیہ اور یورپی ممالک کی طرف سے اسی طرح کی تجاویز کو مسترد کر دیا تھا۔
Short Link: https://urdu.app.com.pk/urdu/?p=557373
