لاہور۔20نومبر (اے پی پی):ڈی جی ایل ڈی اے طاہر فاروق کی ہدایات پر ایل ڈی اے ٹیموں کا غیرقانونی کمرشل عمارتوں اور کمرشل فیس نادہندگان املاک کے خلاف روزانہ کی بنیاد پر بھرپور آپریشن جاری ہے۔غیرقانونی کمرشل عمارتوں وکمرشل فیس نادہندگان املاک کے خلاف جاری آپریشن میں ایل ڈی اے ٹیموں نے مختلف علاقوں میں کارروائیاں کر کے 119املاک سربمہرکر دی گئیں۔
ایل ڈی اے ٹیموں نے گلبرگ،نیو گارڈ ن ٹائون،علامہ اقبال ٹائون،واپڈا ٹائون،نیسپاک کالج روڈ، نیو مسلم ٹائون اور کینال روڈ کے اطراف میں کارروائیاں کیں۔ٹیموں نے گلبرگ، نیوگارڈن ٹائون میں 34،علامہ اقبال ٹائون میں 28،واپڈا ٹائون،نیسپاک کالج روڈ پر32،نیو مسلم ٹائون، کینال روڈ کے اطراف میں 25 املاک سیل کر دیں۔سیل کی گئی املاک میں نجی سکول،بیکری، فارمیسی، ہال، دفاتر، کیفے،بیکری، ریستوران،گراسری سٹور، سیلون، دکانیں و دیگر شامل ہیں۔آپریشن سے پہلے ان املاک کو متعدد نوٹسز دیئے گئے تھے۔آپریشن چیف ٹائون پلانر ون اسد الزمان اور چیف ٹاون پلانر ٹو اظہر علی کی زیر نگرانی کیا گیا۔ڈی جی ایل ڈی اے طاہر فاروق کی ہدایت پر شہر میں غیرقانونی کمرشل عمارتوں /کمرشل فیس نادہندگان کے خلاف بلا امتیاز کارروائیاں جاری ہیں۔
Short Link: https://urdu.app.com.pk/urdu/?p=527443
