فارن فنڈڈ فتنے نے مان لیا ہے کہ انہوں نے آرمی چیف کو غیر معینہ مدت کے لئے توسیع کی پیشکش کی تھی،مریم اورنگزیب

اسلام آباد۔27اکتوبر (اے پی پی):وفاقی وزیر اطلاعات و نشریات مریم اورنگزیب نے کہا ہے کہ فارن فنڈڈ فتنے نے مان لیا ہے کہ انہوں نے آرمی چیف کو غیر معینہ مدت کے لئے توسیع کی پیشکش کی تھی، ان کے ساتھ وہی سلوک ہو رہا ہے جس کے وہ مستحق ہیں، تمام والدین اپنے بچوں، بچیوں اور فیملیز کو کل عمران خان کے خونی مارچ سے محفوظ رکھیں۔

جمعرات کو پی ٹی آئی چیئرمین عمران خان کے بیان پر ردعمل کا اظہار کرتے ہوئے وفاقی وزیر اطلاعات نے کہا کہ عمران خان آپ نے کرپشن نہیں کی، چار سال ڈاکے ڈالے ہیں۔ انہوں نے کہا کہ ملک تباہی کی طرف جانے سے چھ ماہ پہلے بچ گیا، الحمد اللہ۔ وفاقی وزیر اطلاعات نے کہا کہ فارن فنڈڈ فتنہ فوج کے امیج کو بہتر نہیں صرف فوج میں بغاوت اور شہدا کے خلاف مہم چلا سکتے ہیں۔

پاکستان تحریک انصاف کو صرف فارن فنڈڈ فتنے نے کریش کیا ہے۔ انہوں نے کہا کہ شہباز شریف اور رانا ثناء اللہ جرائم پیشہ تھے تو آپ چار سال میں ثابت کر دیتے، جاسوسی کی اجازت عمران خان نے خود دی ہوئی تھی، عمران خان نے اقتدار میں آتے ہی اپنے قریب ترین لوگوں سے آنکھیں بدل لیں، عمران نیازی کو آزاد میڈیا سے نہیں بلکہ اپنے اندر کے فتنے کا خوف تھا۔ انہوں نے کہا کہ الیکشن آئینی مدت پوری ہونے پر آئندہ سال ہوں گے، انشاء اللہ۔

Short Link: https://urdu.app.com.pk/urdu/?p=334669