اسلام آباد۔29اگست (اے پی پی):تمباکو کے کاشتکاروں کے بچوں کو ہنر مندبنانے کیلئے فلپ مورس (پاکستان)لمیٹڈ-پی ایم پی کے ایل لیف (پی کے لیف) نے2024 کیلئے سکلز ٹریننگ پراجیکٹ کا ایک اور مرحلہ کامیابی کے ساتھ مکمل کر لیا۔ جمعرات کو جاری بیان میں کہا گیا کہ پی ایم پی کے ایل لیف ہر سال کمپنی کیلئے کام کرنے والے تمباکو کے کاشتکاروں کے بچوں کو تربیت فراہم کرتا ہے۔
عام طور پر یہ پراجیکٹ جون سے اگست تک ایسے وقت میں منعقد کیا جاتا ہے جب بچے موسم گرما کی تعطیلات کے دوران فارغ ہوتے ہیں اور تمباکو کے کھیتوں میں چائلد لیبر کا شکار ہو سکتے ہیں کیونکہ اس مدت میں تمباکو کی فصل کی کٹائی اور خشک کرنے کا عمل عروج پر ہوتا ہے۔پراجیکٹ کے تحت بچوں کو تجارتی مہارتوں کے بارے میں بنیادی تعلیم دی جاتی ہے، انہیں الیکٹریشن اور ٹیلرنگ کی عملی تربیت کے علاوہ ایگری کلچر/ ہارٹی کلچر سائنس (پودوں میں پیوندکاری وغیرہ)، لڑکوں کیلئے بنیادی صحت اور حفظان صحت، فوڈ پراسسنگ اور انہیں محفوظ بنانا (فروٹ سیرپ، ویجیٹل پیوری وغیرہ) اور لڑکیوں کیلئے بنیادی صحت اور حفظان صحت کے حوالے سے ہفتہ وار اضافی تربیت بھی دی جاتی ہے۔
رواں سال پراجیکٹ کی اختتامی تقریب 29اگست، 2024کو سوابی میں منعقد ہوئی جس میں پی کے لیف کی مینجمنٹ، پراجیکٹ کے عمل درآمدی شراکت داری ڈریگن فلائی ایگری کلچر نے شرکت کی۔ تربیت کی تکمیل پر 896(448لڑکوں اور 448لڑکیوں) کو سرٹیفکیٹس اور شیلڈز دی گئیں۔تربیت مکمل کرنے والے ٹرینیز کی مہارتوں کو مزید بہتر بنانے کے لئے لڑکوں کو بلڈنگ الیکٹریشن ٹول کٹ اور لڑکیوں کو سلائی مشین دی گئیں۔
اس تقریب میں ٹرینیزکے تیار کردہ پروڈکٹس اور منصوبوں کی نمائش بھی کی گئی جس سے ان کی مہارت اور پراجیکٹ کے دوران حاصل ہونے والے علم کی عکاسی ہوئی۔اس موقع پر خطاب کرتے ہوئے منیجر سوشل سسٹین ایبیلیٹی سید محمد سیلمان گل نے کہا کہ 2021سے لے کر اب تک پراجیکٹ کے تحت 3 ہزار سے زائد بچوں کو سکلز ٹریننگ فراہم کرتے ہوئے انہیں قیمتی مہارتوں سے لیس کیا گیا اور انہیں ترغیب دی گئی کہ وہ مستقبل میں چھوٹے پیمانے پر اپنا خود کا کاروبار شروع کریں۔
پروجیکٹ کے حوالے سے متعدد کیس اسٹڈیز سے پتہ چلتا ہے کہ پراجیکٹ کے تحت تربیت حاصل کرنیو الے ٹرینیز جوانی میں قدم رکھتے ہی خود روزگار کی طرف راغب ہوتے ہیں۔ یہ کامیابی تربیتی نصاب کی مرہون منت ہے جو ہنر مند افرادی قوت کی بڑھتی ہوئی طلب کو پورا کرنے کے لیے تیار کیا گیا ہے۔
لیف کے سربرارہ عابد جاوید نے کہا کہ پائیداری ہمارے تمام آپریشنز کا لازمی جزو ہے،ہمیں اس پراجیکٹ کے طبقات پر مثبت اثرات دیکھ کر بہت خوشی ہوئی، تربیت حاصل کرنے والوں کی کامیابی کی داستانیں ان کی زندگی میں سکلز ٹریننگ کی اہمیت کا ثبوت ہیں، سکلز ٹریننگ پراجیکٹ نہ صرف بچوں کو چائلڈ لیبر سے بچاتا ہے بلکہ تمباکو کے کاشتکاروں کے بچوں کو ضروری مہارتوں کے ساتھ بااختیار بنانا ہے تاکہ وہ خود کو آج کے ملازمتوں کی مسابقتی مارکیٹ میں تیار کر سکیں۔
”ہم پاکستان میں ایک پائیدار کاروباری ماحول کو فروغ دینے کے لیے پرعزم ہیں جو بچوں کی ترقی، مہارتوں اور ایسی سرگرمیوں کے فروغ میں کر دار ادا کررہا ہے جو ہمارے تمباکو کے کاشتکاروں کو سماجی، ماحولیاتی اور اقتصادی پہلوئوں پر فائدہ پہنچاتی ہیں۔
Short Link: https://urdu.app.com.pk/urdu/?p=498593
