فیصل آباد ۔ 27 دسمبر (اے پی پی):کاشتکاروں کوبہاریہ مکئی کی کاشت 15جنوری سے شروع کرنے کی ہدایت کی گئی ہے ۔ ریسرچ انفارمیشن یونٹ آری فیصل آباد کے مطابق کاشتکار بہاریہ مکئی کی کاشت کےلئے زمین کے انتخاب اور اس کی تیاری پر خصوصی توجہ دیں تاکہ بمپر کراپ کے حصول میں مدد مل سکے۔
بہاریہ مکئی کی کاشت جو جنوری کے دوسرے پندرواڑے کے آغاز پر شروع ہوتی ہے کےلئے ایسی بھاری میرا زمین کا انتخاب ضروری ہے جو پانی کو بخوبی جذب کرنے کی صلاحیت رکھتی ہو نیز ایسی زمین جس میں برسیم یا آلو کاشت کئے گئے ہوں وہاں مکئی کی فصل بہتر نشو ونما پاتی ہے۔ انہوں نے بتایاکہ کہ کلراٹھی، ریتلی اور سیم زدہ زمین کے علاوہ ایسی زمین جس کی پی ایچ 8سے زائد ہومکئی کی کاشت کیلئے موزوں نہیں۔
انہوں نے بتایا کہ جس زمین میں مکئی کاشت کرنی ہو اس کے اردگرد درخت نہیں ہونے چاہیے کیونکہ درختوں کے سائے میں مکئی کی فصل کامیابی کے ساتھ نہیں اگائی جاسکتی۔انہوں نے بتایا کہ بہاریہ مکئی کی کاشت کےلئے زمین کی تیاری بھی اچھی طرح کرنی چاہیے کیونکہ اگر مکئی آلو والے کھیتوں میں کاشت کرنی ہو تو دویا تین ہل چلا کر سہاگہ دینے سے زمین نرم اور بھربھری ہوجائے گی تاہم اگر کپاس کماد یا سورج مکھی والے وڈھ میں کاشت کرنا ہو تو وڈھ وغیرہ میں روٹا ویٹر چلاکر وڈھ کو اچھی طرح تلف کرنے کے بعد تین مرتبہ ہل چلا کر سہاگہ دینا بھی ضروری ہے۔
اس ضمن میں مزید معلومات، مشاورت، رہنمائی کےلئے ماہرین زراعت، محکمہ زراعت کے فیلڈ سٹاف یا فری ایگریکلچرل ہیلپ لائن سے بھی رابطہ کیا جا سکتاہے۔
Short Link: https://urdu.app.com.pk/urdu/?p=539968
