لاہور۔30نومبر (اے پی پی):پاکستان کرکٹ بورڈ نے پاکستان کے ٹیسٹ کپتان شان مسعود کے سینٹرل کنٹریکٹ کو اپ گریڈ کرکے انہیں ڈی سے بی کیٹگری میں کردیا ہے۔
پی سی بی ترجمان کے مطابق یہ فیصلہ اپنی اس پالیسی کے تحت کیا ہے کہ اگر سینٹرل کنٹریکٹ میں شامل کوئی بھی کھلاڑی جو اے یا بی کیٹگری سے نیچے ہے اور وہ کپتان بنتا ہے تو اس کا کنٹریکٹ اس وقت تک بی کیٹگری میں کردیا جائے گا جب تک وہ کپتانی کر رہا ہے۔34 سالہ شان مسعود کو پندرہ نومبر کو پاکستان ٹیسٹ ٹیم کا کپتان مقرر کیاگیا ، وہ آئی سی سی ورلڈ ٹیسٹ چیمپئن شپ25-2023ء تک کپتانی کریں گے۔
بائیں ہاتھ سے بیٹنگ کرنے والے شان مسعود 30 ٹیسٹ میچوں میں 1597 رنز بنا چکے ہیں اور بحیثیت کپتان ان کا پہلا اسائنمنٹ آسٹریلیا کے خلاف ہونے والی تین میچوں کی ٹیسٹ سیریز ہے جو 14 دسمبر سے شروع ہورہی ہے۔سیریز کا پہلا ٹیسٹ14 سے 18دسمبر تک پرتھ میں کھیلا جائے گا۔دوسرا ٹیسٹ 26 سے30 دسمبر تک میلبرن میں ہوگا جبکہ تیسرا ٹیسٹ3 سے7 جنوری تک سڈنی میں کھیلا جائے گا۔
Short Link: https://urdu.app.com.pk/urdu/?p=415391
