لاڑکانہ،قائدِ عوام کے دئیے گئے پلیٹ فارم میں ہر شہری کے حقوق کو تحفظ حاصل ہے،بلاول بھٹو زرداری

Bilawal Bhutto Zardari
Bilawal Bhutto Zardari

لاڑکانہ۔14اپریل (اے پی پی):پاکسٹان پیپلز پارٹی کے چیئرمین بلاول بھٹو زرداری نے کہا ہے کہ قائد عوام شہید ذوالفقار علی بھٹو کی برسی کے حوالے سے عظیم الشان جلسہ عام ایک بار پھر غریب و محنت کش عوام میں بھٹو ازم کی وسیع مقبولیت کا عکاس ہوگا،آئیے آج نئے عزم کے ساتھ بھٹو کے نظریے اور اصولوں سے اپنی وابستگی کا اعادہ کرنے کے لیے بروئے کار لائیں،آج کا اجتماع محض ایک جلسہ نہیں ہے، بلکہ اجتماعی طور قائد عوام کے اصولوں کی پیروی کا اعادہ کرنا ہے،ان خیالات کا اظہار انہوں نے قائد عوام شہید ذوالفقار علی بھٹو کی برسی کے حوالے سے اپنے جاری کردہ ایک پیغام میں کیا ہے۔

بلاول بھٹو زرداری نے کہا ہے کہ قائدِ عوام کا دیا ہوا پلیٹ فارم وہ ہے جہاں پسماندہ طبقات کی آوازیں سنی جاتی ہیں اور ہر شہری کے حقوق کے تحفظ ملتا ہے،شہید بھٹو کی لیگیسی کو خراج عقیدت پیش کرنے کے لیے عوام جمع ہو رہے ہیں۔انہوں نے کہا کہ شہید بھٹو کیس کے متعلق سپریم کورٹ کا حالیہ فیصلہ سچائی اور انصاف کی نشاندہی کرتا ہے،عدالتی فیصلے میں قائدِ عوام سے ہونے والی سنگین ناانصافی اور منصفانہ ٹرائل کے بنیادی حق سے محروم رکھنے کا اعتراف کیا گیا،یہ ایک قانونی فیصلے کے ساتھ ساتھ جمہوریت اور انصاف کے لیے قائد عوام کی غیر متزلزل جدوجہد اور لگن کی اخلاقی توثیق ہے۔

انہوں نے کہا کہ آج تاریخی اجتماع میں شرکت کے لئے ملک بھر سے گڑھی خدا بخش آنے والے تمام جیالوں کو سلام پیش کرتا ہوں،آپ کی موجودگی بھٹو ازم کی مضبوط لیگیسی اور عوام کے غیر متزلزل جذبے کا منہ بولتا ثبوت ہے،آج ہم شہید بھٹو کو خراج عقیدت پیش کرنے کے ساتھ ساتھ ان نظریات کی پاسداری کا بھی عہد کریں جن کی خاطر انہوں نے اپنی زندگی تک قربان کردی۔

بلاول بھٹو زرداری نے کہا کہ آئیے ایک ایسے پاکستان کی تعمیر کی جدوجہد کریں جہاں انصاف کی بالادستی ہو،ایک ایسا پاکستان جہاں جمہوریت پروان چڑھے اور ہر شہری اپنی پوری صلاحیتوں کو بروئے کار لانے کے لیے بااختیار ہو،آئیے سب مل کر قائدِ عوام شہید ذوالفقار علی بھٹو کے حوصلے و جذبے کو مشعلِ راہ بنا کر ایک نئے عزم کے ساتھ آگے بڑھیں۔