اقوام متحدہ ۔11اکتوبر (اے پی پی):اقوام متحدہ نے کہا ہے کہ لبنان اور فلسطین میں امن کے قیام کے لیے جنگ بندی انتہائی ضروری ہے۔یواین نیوز کے مطابق ان خیالات کا اظہار اقوام متحدہ کے سیکرٹری جنرل انتونیو گوتریش نے ایک بیان میں کیا۔ انہوں نے خبردار کیا کہ لبنان وسیع پیمانے کی جنگ کے دہانے پر ہے، تمام ممالک کی خودمختاری اور علاقائی سالمیت کا احترام کیا جانا چاہیے۔
اسرائیل کے مقبوضہ مغربی کنارے اور لبنان کے خلاف حملوں سے پورے خطے کو در پیش خطرے کی وضاحت کرتے ہوئے انہوں نے کہا کہ تمام ممالک کی خودمختاری اور علاقائی سالمیت کا احترام کیا جانا چاہیے۔انہوں نے کہا کہ ہر حملہ امن کے قیام کو مزید کھٹائی میں ڈال رہا ہے، اس بنا پر ہم غزہ اور لبنان میں فائر بندی ، اسیروں کی رہائی اور انسانی امداد کی ترسیل کی اپیل سے پیچھے نہیں ہٹیں گے۔
دو مملکتی حل کے نظریے پر قائم رہنے پر زور دیتے ہوئے اقوام متحدہ کے سربراہ نے کہاکہ تمام انسانوں کو پر امن ماحول میں زندگی گزارنے کا حق حاصل ہے۔
Short Link: https://urdu.app.com.pk/urdu/?p=511154
