اسلام آباد۔30ستمبر (اے پی پی):ماضی کے نامور اداکار، ہدایتکار، فلمساز سید کمال کی برسی بروز منگل یکم اکتو بر کو منائی جائے گی۔ وہ 27 اپریل 1934 کو بھارت کے شہر میرٹھ میں پیدا ہوئے اور 1957 کو پاکستان منتقل ہو گئے،پاکستان آ کر انہوں نے اگلے سال ہی اپنی پہلی فلم ’ٹھنڈی سڑک‘ بنائی۔ سید کمال نے اپنے فلمی کیریئر کا آغاز قیام پاکستان سے قبل ممبئی میں بننے والی فلم باغی سردارکے ایک مختصر کردار سے کیا۔سید کمال نے 2000 تک 84 فلموں میں کام کیا جن میں 75 اردو، 8 پنجابی اور ایک پشتو فلم شامل تھی۔
ان کی مشہور فلموں میں زمانہ کیا کہے گا، آشیانہ، ایسا بھی ہوتا ہے، ایک دل دو دیوانے، بہن بھائی، ہنی مون، روڈ تو سوات اور نئی لیلیٰنیا مجنوں سرفہرست ہیں۔انہوں نے بطور فلمساز اور ہدایتکار بھی کئی فلمیں بنائیں جن میں جوکر، شہنائی،ہنی مون، ہیرو، آخری حملہ، انسان اور گدھا، جٹ کڑیاں توں ڈردا، آج دی کڑیاں، کل دے منڈے اور سیاست کے نام شامل تھے۔سید کمال کو ان کی اداکاری پر لاتعداد ایوارڈز بھی دئیے گئے جن میں تین نگار ایوارڈز کے علاوہ لائف اچیومنٹ ایوارڈ بھی شامل ہے۔ سید کمال یکم اکتوبر 2009 کو کراچی میں انتقال کر گئے تھے۔ ان کی برسی کے موقع پر شوبز انڈسٹری کے زیر اہتمام منعقدہ تقریبات میں سید کمال کی خدمات پر خراج تحسین پیش کیا جائے گا۔
Short Link: https://urdu.app.com.pk/urdu/?p=506779
