اسلام آباد۔10ستمبر (اے پی پی):پاکستان انسٹی ٹیوٹ آف ڈویلپمنٹ اکنامکس ( پی آئی ڈی ای) کی کانفرنس میں مقررین نے کہا ہے کہ مالیاتی پالیسی پر عمل درآمد کے لیے فائلر اور نان فائلر کے درمیان فرق کو ختم کرنا ہوگا۔پاکستان انسٹی ٹیوٹ آف ڈویلپمنٹ اکنامکس میکرو پالیسی لیب نے حال ہی میں اسلام آباد میں "فکسنگ مالیاتی پالیسی” گول میز کانفرنس کی میزبانی کی۔
اس تقریب نے پاکستان میں مالیاتی بے ضابطگی کے مسلسل چیلنج سے نمٹنے اور ملک کی مالیاتی پالیسی کے لیے ایک بصیرت کا راستہ وضع کرنے کی کوشش کی۔اس موقع پر ڈاکٹر ناصر اقبال ایسوسی ایٹ پروفیسر اور چیف آف میکرو پالیسی لیب پی آئی ڈی ای نے کہا کہ گول میز کانفرنس "فکسنگ فسکل پالیسی” کا مقصد پالیسی سازوں اور سوچنے والے رہنماؤں کو متحد کرنا ہے تاکہ باہمی تعاون اور مقامی حل کو فروغ دیا جا سکے۔
اس موقع پر اپنے ابتدائی خطاب میں ڈاکٹر ندیم الحق، وی سی پی آئی ڈی ای نے کہا کہ مالیاتی پالیسی کے تعین کے لیے تین چیزوں پر توجہ دینے کی ضرورت ہے،سب سے پہلےمؤثر مالیاتی انتظام کو یقینی بنانے میں حکومت کا کردار اہم ہے، دوم ٹیکس اور اخراجات کو احتساب کے ساتھ شفاف طریقے سے انجام دیا جائے۔ اس میں یہ شامل ہے کہ ٹیکس کیسے جمع کیا جائے، کیسے خرچ کیا جائے اور فنڈز کہاں مختص کیے جائیں۔ آخر میں قرض کا انتظام بھی ایک اہم پہلو ہے جس پر توجہ دینے کی ضرورت ہے۔ ڈاکٹر اشفاق حسن خان، سکول آف سوشل سائنسز اینڈ ہیومینٹیز، نسٹ کے پرنسپل نے گول میز اجلاس سے خطاب کرتے ہوئے کہا کہ معاشی چیلنجز سے نمٹنے کے لیے ضروری ہے کہ حکومت کے کردار کو فوری طور پر ایک فعال کھلاڑی سے سہولت کار پر تبدیل کیا جائے
۔انہوں نے کہا کہ اس میں موجودہ ضابطے پر مبنی نظام کو ختم کرنا اور اصول پر مبنی معیشت کی طرف منتقلی شامل ہوگی۔ انہوں نے کہا کہ ریگولیٹری گیلوٹین کا استعمال غیر ضروری نو آبجیکشن سرٹیفکیٹس (این او سی) کے خاتمے میں مدد کرے گا۔شرکاء میں ملک بھر کے مختلف اداروں جیسے کہ وزارت منصوبہ بندی، ترقی اور خصوصی اقدامات، پی اینڈ ڈی بلوچستان،،قائداعظم یونیورسٹی ،زیبسٹ ، امریکی سفارت خانہ، پنجاب، انٹرنیشنل اسلامی یونیورسٹی اور نسٹ کے سینئر ماہرین اقتصادیات، اور کامسیٹس کےمحققین اور مالیاتی ماہرین شامل تھے۔
