لاہور۔18اپریل (اے پی پی):سوئی گیس کے ترجمان نے کہا ہے کہ مالی سال 2025-26 کیلئے مجوزہ اوسط تعین شدہ قیمت 2,485.72 روپے فی ایم ایم بی ٹی یو مقرر کی گئی ہے، قیمت میں اضافے کا تقریبا 51 فیصد حصہ مہنگی RLNG گیس (آر ایل این جی) کو سسٹم گیس کے صارفین کو فراہم کرنے کی مد میں ہے، اس تبدیلی کی بنیادی وجہ آر ایل این جی کے مقررہ حجم کی بجلی کے شعبے میں کھپت میں کمی ہے۔ترجمان کے مطابق اس کے ساتھ ساتھ کیپٹیو پاور پلانٹس (سی پی پیز ) کی گیس کھپت میں کمی بھی اس تبدیلی کا سبب بنی ہے، کیونکہ حکومتی پالیسی کے تحت ان پلانٹس کو نیشنل پاور گرڈ پر منتقل کیا جا رہا ہے
تاکہ پاور کی پیداواری صلاحیت کا بہتر استعمال ممکن بنایا جا سکے،قیمت میں اضافے کا مزید 39 فیصد حصہ لیٹ پیمنٹ سرچارج ( ایل پی ایس ) کی مد میں بنتا ہے جو کہ گیس سیکٹر کے واجبات (سرکلر ڈیٹ) پر لاگو ہوا ہے، ماضی میں اوگرا نے اس رقم کو تعین شدہ قیمت میں شامل کرنے کی اجازت نہیں دی تھی۔ ترجمان کے مطابق کمپنی کی کل آمدن کی ضروریات میں آپریٹنگ اخراجات کا حصہ محض4 سے 6 فیصد جبکہ قیمت میں اضافے کا باقی معمولی حصہ آپریٹنگ اخراجات، ضروری اثاثہ جات کے اضافے اور تنزلی/کمی پر مشتمل ہے جو نظام کی مسلسل فعالیت اور گیس کی مسلسل و بلا تعطل فراہمی کو یقینی بنانے کے لیے نہایت اہم ہیں۔
Short Link: https://urdu.app.com.pk/urdu/?p=584116
