لاہور۔9اپریل (اے پی پی):پاکستان مسلم لیگ (ن)کے صدر محمد نواز شریف سے بدھ کو یہاںوفاقی وزیر توانائی سردار اویس خان لغاری نے ملاقات کی۔ اس موقع پرقائد محمد نواز شریف نے بجلی کی قیمتوں میں کمی پر مبارک باد دی۔ دوران ملاقات گفتگو کرتے ہوئے محمد نواز شریف نے کہا کہ مسلم لیگ (ن)نے عوام کے ریلیف اور ملک کی خدمت کو ہمیشہ مقدم رکھا ہے، یہی ہماری روایت ہے یہی ہماری سیاست ہے، عوام کی آسانی میرے دل کا سکون ہے۔
انہوں نے کہا کہ آئی ایم ایف پروگرام میں ہوتے ہوئے بجلی کی قیمتوں میں کمی آسان کام نہیں تھا، اس عظیم کارنامے پروزیراعظم محمد شہباز شریف اور ان کی پوری ٹیم مبارکباد کی مستحق ہے، اللہ تعالی کا شکر ہے کہ عوام سے کئے وعدے پورے ہو رہے ہیں ۔
وفاقی وزیر توانائی سردار اویس خان لغاری نے کہا کہ آپ کی راہنمائی نے وزیراعظم محمدشہباز شریف اور ان کی ٹیم کو کامیاب کیا ، وفاقی وزیر نے پارٹی قائد کو توانائی کے شعبے میں اصلاحات، اوپن مارکیٹ کے قیام سے بجلی مزید سستی کرنے، بجلی چوری اور گردشی قرض سے مستقل نجات پر اقدامات سے آگاہ کیا۔
Short Link: https://urdu.app.com.pk/urdu/?p=579977
