محنت کش قوم کی ریڑھ کی ہڈی ہیں اور ان کی خدمات قابلِ فخر ہیں، یومِ مزدور پر اعظم نذیر تارڑ کا محنت کشوں کو خراجِ تحسین

اسلام آباد۔1مئی (اے پی پی):وفاقی وزیر قانون و انصاف سینیٹر اعظم نذیرتارڑ نے یومِ مزدور پر محنت کشوں کو خراجِ تحسین کرتےہوئے کہا ہے کہ محنت کش قوم کی ریڑھ کی ہڈی ہیں اور ان کی خدمات قابلِ فخر ہیں۔

وزارت قانون و انصاف کی جانب سے جاری بیان میں وفاقی وزیر نے کہا کہ محنت کشوں کے حقوق کا تحفظ حکومت کی اولین ترجیح ہے، مزدور کی خوشحالی، پاکستان کے روشن مستقبل کی ضمانت ہے۔ انہوں نے کہا کہ وزارت قانون و انصاف مزدوروں کے لیے مضبوط قانونی تحفظات کی حامی ہے، انصاف، وقار اور تحفظ ہر محنت کش کا بنیادی حق ہے۔

وفاقی وزیر نے مزید کہاکہ محنت کش طبقہ صرف اپنے خاندان کا سہارا ہی نہیں ہوتے بلکہ ملکی معیشت کا سہارا ہیں۔ انہوں نے یومِ مزدور پر مزدوروں کی عظمت، لگن اور قربانیوں کو سلام بھی پیش کیا۔

Short Link: https://urdu.app.com.pk/urdu/?p=590790