لاہور۔17اپریل (اے پی پی):محکمہ داخلہ پنجاب نے صوبے بھر کی ضلعی انتظامیہ کو مسیحی برادری کے تہوار گڈ فرائیڈے اور ایسٹر کے موقع پر امن و امان برقرار رکھنے کےلئے فول پروف سکیورٹی انتظامات یقینی بنانے کی ہدایت کی ہے۔تفصیلات کے مطابق دنیا بھر کی طرح پاکستان میں بھی مسیحی برادری جمعہ 18 اپریل کو گڈ فرائیڈے، اتوار 20 اپریل کو ایسٹر اور مجموعی طور پر مقدس ہفتہ منا ر ہی ہے ،
اس دوران گرجا گھروں میں عبادت اور دعائیہ تقریبات کے علاوہ تفریحی مقامات کا بھی رخ کیا جائے گا۔ترجمان کےمطابق محکمہ داخلہ پنجاب نے ہدایت کی ہے کہ مسیحی عبادت گاہوں، رہائشی علاقوں اور عوامی مقامات کی سکیورٹی پر خصوصی توجہ دی جائے،اس کے علاوہ تمام شہری مراکز، تفریحی پارکس، شاپنگ سینٹرز اور سنیما ہالز پر بھی توجہ مرکوز رکھنے کی ہدایت کی گئی ہے۔
محکمہ داخلہ نے مسیحی عبادت گاہوں اور رہائشی علاقوں میں ہائی ریزولوشن کیمرے نصب کرنے کی ہدایت کی جبکہ تمام اضلاع میں قائم کنٹرول رومز کو محکمہ داخلہ کے مرکزی کنٹرول سے منسلک کیا جائے گا۔ اس دوران تمام ہوٹلز، سرائے اور ریسٹ ہاسز میں ہوٹل آئی سافٹ وئیر کا استعمال یقینی بنایا جائے گا۔ محکمہ داخلہ نے ہدایت کی کہ بین المذاہب ہم آہنگی کمیٹیوں اور امن کمیٹیوں کا انعقاد کیا جائے اور مقدس ہفتے کے دوران قانون نافذ کرنے والے اداروں کےساتھ مسیحی برادری کے رضاکار بھی ہائی الرٹ رہیں۔
ترجمان نے بتایا کہ گرجا گھروں کے تمام داخلی راستوں پر سخت اور بلاامتیاز چیکنگ یقینی بنائی جائے گی، انتظامیہ حساس مقامات پر واک تھرو گیٹس اور میٹل ڈیٹیکٹر فراہم کرے گی۔ انہوں نے کہا کہ تمام اضلاع میں سکیورٹی پلان کےساتھ ٹریفک مینجمنٹ پر بھی توجہ دی جا رہی ہے ، قانون نافذ کر نے والے ادارے تمام ضروری مشقیں مکمل کر رہے ہیں۔
محکمہ داخلہ نے نشاندہی کردہ علاقوں میں سنیپ چیکنگ اور کومبنگ آپریشنز مکمل کرنے اور قانون نافذ کرنے والے اداروں کے درمیان انٹیلیجنس شئیرنگ یقینی بنانے کی بھی ہدایت کی ۔ پنجاب کے تمام اضلاع میں ڈپٹی کمشنرز اور ڈی پی اوز ذاتی طور پر سکیورٹی انتظامات کی نگرانی کریں گے۔ محکمہ داخلہ نے جاری کردہ سکیورٹی آڈٹ رپورٹ کی روشنی میں خامیوں کو دور کرنے اور موثر حکمت عملی اپنانے پر زور دیا ۔
محکمہ داخلہ نے ڈویژنل اور ضلعی انٹیلیجنس کمیٹیوں کے اجلاس بلا کر حفاظتی انتظامات کو حتمی شکل دینے کی ہدایت کی ہے۔ سکیورٹی ڈیوٹی پر مامور عملے کو ہدایت کی گئی ہے کہ تقریبات کے اختتام تک ڈیوٹی پر موجود رہیں۔ امن و امان کے قیام اور انسانی جان و مال کی حفاظت کیلئے محکمہ داخلہ کے جاری کردہ سکیورٹی ایس او پیز پر سختی سے عملدرآمد یقینی بنایا جائے گا۔
Short Link: https://urdu.app.com.pk/urdu/?p=583300
