سیالکوٹ۔30اگست (اے پی پی):محکمہ زراعت نے کاشتکاروں کو گوبھی کی پنیری پر سفیدمکھی اورلشکری سنڈی کے حملہ کے خدشہ کے پیش نظر حفاظتی اقدامات کی ہدایت کی ہے اور کہا ہے کہ حبس کے باعث گوبھی کی پنیری پر سفیدمکھی اور لشکری سنڈی کے حملہ کا خطرہ ہوسکتاہے لہذاپھول گوبھی کے کاشتکار پنیری کا اگاؤمکمل ہونے کے بعد پودوں کی چھدرائی کریں اوربیمار کمزورپودے نکال دیں نیزصحتمند پودوں کی تعدادکامناسب خیال رکھاجائے۔
زراعت آفیسر سیالکوٹ ذیشان گورائیہ نے اے پی پی کوبتایا کہ کاشتکار پنیری کی فصل کا روزانہ معائنہ کریں اور کیڑوں کے تدارک کے لئے نئی کیمسٹری کی زرعی ادویات استعمال کی جائیں۔ انہوں نے کہا کہ کاشتکار پنیری منتقل کرنے سے پہلے اچھی طرح آبپاشی کریں تاکہ پودوں کی جڑیں نرم ہوجائیں اور اکھاڑتے وقت انہیں ٹوٹنے سے بچایاجاسکے۔
انہوں نے بتایا کہ کاشتکار فصل کمزور ہونے کی صورت میں ایک پاؤیوریا کھاد فی مرلہ استعمال کریں تاکہ پنیری صحت مند رہتے ہوئے بہتر بڑھوتری کرسکے۔ انہوں نے کہا کہ اس سلسلہ میں مزیدمعلومات یا راہنمائی کے لئے محکمہ زراعت کے فیلڈ سٹاف سے بھی رابطہ کیاجاسکتاہے۔
Short Link: https://urdu.app.com.pk/urdu/?p=384024
