فیصل آباد ۔ 09 اکتوبر (اے پی پی):محکمہ لائیو سٹاک و ڈیری ڈویلپمنٹ نے شہریوں کی سہولت کیلئے فری ہیلپ لائن قائم کردی ہے لہٰذا مویشی پال حضرات،پولٹری فارمرز، کسان اور شہری ہیلپ لائن 080009211 پر رابطہ کرکے مویشیوں، جانوروں اور پرندوں کی بیماریوں اور ان کے علاج سے متعلق معلومات حاصل کرسکتے ہیں۔
ایڈیشنل ڈائریکٹر محکمہ لائیو سٹاک و ڈیری ڈویلپمنٹ فیصل آبادڈاکٹرقیصر خلیق نے بتایا کہ پالتو جانوروں کو علاج کی معیاری طبی سہولیات مویشی پال حضرات کو ان کی دہلیز پر فراہم کی جارہی ہیں جبکہ سول ویٹرنری ہسپتال لیاقت روڈفیصل آباد کے کیئر ہسپتال میں آپریشن کے علاوہ الٹراساؤنڈ کی سہولت بھی دستیاب ہے۔
انہوں نے بتایا کہ ویٹرنری ہسپتالوں اور لائیو سٹاک ڈسپنسریز میں بیمار اور زخمی جانوروں کا علاج معالجہ بھی جاری ہے اور اس حوالے سے جانوروں کو علاج معالجہ کی سہولیات کی فراہمی کیلئے تمام دستیاب وسائل بروئے کار لائے جارہے ہیں جبکہ اس ضمن میں جانوروں کا ہسپتال بھی مکمل فعال اورمویشی پال حضرات سے متعلقہ ڈاکٹرصاحبان و فیلڈ سٹاف کاقریبی رابطہ ہے۔انہوں نے بتایا کہ دیرپا کٹائیاں دینے والے چارہ باجرہ نیپئرہائبرڈ کی قلمیں کاشتکاروں کو مفت فراہم کی جارہی ہیں تاکہ وہ زیادہ سے زیادہ سبز چارہ کاشت کرسکیں۔
Short Link: https://urdu.app.com.pk/urdu/?p=510231
