لاہور۔22مارچ (اے پی پی):وزیر اطلاعات پنجاب عظمی بخاری نے کہا ہے کہ خیبرپختونخواہ حکومت نے مرکز بحالی پروجیکٹ کے 182 ملازمین کو ایک ہی دن میں نوکری سے برطرف کر دیا،کے پی حکومت کا محکمہ اطلاعات سوشل میڈیا بریگیڈ کو کروڑوں روپے فراہم کرتا ہے جو دن رات پاکستان اور قومی سلامتی اداروں کے خلاف پروپیگنڈہ کرتا ہے جبکہ دوسری جانب سرکاری ملازمین کی تنخواہوں کی ادائیگی کے لیے ان کے پاس فنڈز نہیں ہوتے۔
عظمی بخاری نے کہا کہ کے پی حکومت کے پاس احتجاج، جلسے اور مارچ پر خرچ کرنے کے لیے ہمیشہ وسائل دستیاب ہوتے ہیں جبکہ بلدیاتی نمائندے دو سال سے فنڈز نہ ملنے پر سڑکوں پر احتجاج کر اور تعلیمی اداروں کے ملازمین بھی شدید پریشانی کا شکار ہیں۔
انہوں نے مزید کہا کہ پنجاب میں وزیر اعلی مریم نواز نے صرف ستھرا پنجاب منصوبے کے تحت ایک لاکھ سے زائد نوکریاں فراہم کی ہیں جبکہ درجنوں دیگر منصوبوں میں لاکھوں نئی ملازمتیں پیدا ہوئی ہیں۔
عظمی بخاری نے کہا کہ مریم نواز عوام کی خدمت میں مصروف جبکہ مخالفین عوام کے منہ سے روٹی کا نوالہ چھیننے میں لگے ہوئے ہیں۔
Short Link: https://urdu.app.com.pk/urdu/?p=575469
