ریاض۔20مارچ (اے پی پی):مسجد نبوی میں رمضان المبارک کے دوران روزانہ 300 ٹن آب زمزم فراہم کیا جاتا ہے جو مسجد کے مختلف مقامات پر موجود 18 ہزار کولرز میں بھرا جاتا ہے۔ اردو نیوز کے مطابق ادارہ امور حرمین نے کہا ہے کہ مسجد نبوی میں رمضان المبارک کے دوران دنیا بھر سے بڑی تعداد میں زائرین آتے ہیں۔
مسجد نبوی کی انتظامیہ کی جانب سے آب زم زم کی مستقل بنیادوں پر فراہمی کو یقینی بنانے کے لئے باقاعدہ ادارہ موجود ہے جہاں سینکڑوں کارکنان آب زم زم کی فراہمی کےلئےمامور ہیں۔ ادارے کی جانب سے کولرز کے علاوہ مسجد نبوی کے اندرونی مقامات اور روضہ شریفہ کی جانب سے زائرین کو آب زم زم کی چھوٹی بوتلیں بھی تقسیم کی جاتی ہیں۔
علاوہ ازیں کارکنوں کے ذریعے آب زم زم کے 60 متحرک یونٹس کی سہولت بھی موجود ہے جو معمر اور بیمار زائرین کو ان کی جگہ پر آب زم زم فراہم کرتے ہیں۔
Short Link: https://urdu.app.com.pk/urdu/?p=574520
